Ish-deputeti i LSI: Situata e COVID-19, një teatër i inskenuar nga Rama

Kryedemokrati Lulzim Basha paralajmëroi këtë të diel organizimin e protestave mbarëpopullore nga opozita e bashkuar. Lidhur më këtë deklaratë ka folur ish-deputeti i LSI, Endrit Braimllari në edicionin e lajmeve në “Vizion Plus”.

Braimallari theksoi se qytetarët shqiptarë kanë të drejtë të marrin në dorë fatet e tyre, për aq kohë sa vetë kryeministri Edi Rama arriti të kalojë një “ligj korruptiv” në gjendjen e emergjencës kombëtare.

“Sot shqiptarët kanë të drejtë të marrin në dorë fatin e tyre. Opozita është në mbështetje të Alenacës për Mbrojtjen e Teatrit. Qyetarët e Tiranës i kanë dalë në mbrojtje kësaj aleance. Shqiptarët nuk munden të lejojnë që të drejtohen nga një qeveri e inkriminuar. Protesta popullore do të jetë gjëja më e vogël që do të bëjnë kundër një Kryeministri të papërgjegjshëm. Kur Edi Rama arriti që në gjendjen e emergjencës kombëtare të kalojë një ligj korruptiv, të shembë Teatrin, shqiptarët kanë të drejtë të bëjnë ç’të duan. Rama shkeli hapur ligjin duke ardhur natën dhe duke shembur një pronë publike. Nuk ka më një gjendje të emergjencës kombëtare, sepse ishte vetë Edi Rama që e theu këtë gjendje.”

Mes të tjerash, ish-deputeti e konsideroi situatën e krijuar në vend nga koronavirusi një teatër të inskenuar nga kreu i qeverisë.

“Situata ka qenë një teatër i inskenuar nga Edi Rama. Policët nuk e ruajtën distancimin social. Është një përpjekje për të hequr vëmendjen nga problemet e vendit. Sot shqiptarët nuk kanë mundësi të kalojnë muajin, nuk kanë mundësi punëisimi, për shkak të një Kryeministri që nuk mendon për qytetarët.”