Detaje të reja janë zbardhur nga arrestimi i nënkomisarit Edmond Ruçi, efektiv i Komisariatit të Sarandës, një ditë më parë. Ai u vu në pranga nga Agjencia e Mbikëqyrjes Policore (AMP) në kuadër të një hetimi për korrupsion dhe shpërdorim detyre.
Sipas burimeve për gazetarin e Vizion Plus, Esido Barkaj, Ruçi kishte siguruar informacione për përfshirjen e dy vëllezërve në veprimtari kriminale dhe, pas procedurave fillestare, kishte marrë autorizim nga Prokuroria për përgjimin e tyre.
Lexo edhe :
Related Posts
Nga përgjimet e kryera, dy të dyshuarit kanë komunikuar për aktivitetin e tyre, ndërsa më pas efektivi dyshohet se ka takuar nënën e tyre, duke e informuar për hetimet dhe përgjimet që po zhvilloheshin ndaj djemve të saj. Sipas hetimeve, ai u ka kërkuar përfitime monetare në këmbim të mbylljes së çështjes.
Gruaja më pas ka komunikuar me djemtë e saj për bisedën me oficerin, komunikime që janë regjistruar gjithashtu në përgjime.
Burimet bëjnë me dije se, pasi nuk ka marrë shumën e kërkuar, Edmond Ruçi ka dorëzuar në Prokurori materialet dhe përgjimet ndaj dy vëllezërve, pa qenë në dijeni se në to ishin dokumentuar edhe bisedat që implikonin vetë atë.
Prokuroria pasi ka zbardhur bisedat ka kuptuar lojën e dyfishtë të efektivit ku menjëherë ka lëshuar urdhër për arrestimin e tij.
