Ish-deputetja e LSI, Klajda Gjosha kërkoi menjëherë një strategji kombëtare ekonomike për të zgjidhur problemin me mundësitë e punësimit që ofron Shqipëria.
Duke ju referuar raportit të Forumit Ekonomik Botëror, i cili e renditi Shqipërinë në vendin e parafundit për ofrimin e mundësive të punësimit, Gjosha tha se tani kuptohet qartë pse ikin të rinjtë.
“Mjafton një konstatim i tillë për të kuptuar pse largohen qytetarët shqiptarë, në numra alarmantë, për një vend që nuk është në status lufte! Pamundësia për t’iu përshtatur tregut të punës, mungesa e konkurrencës dhe meritokracisë, mbyllja e dyerve për cdo mundësi për të fituar jetesën, nepotizmi dhe rreziku në çdo moment për ta humbur vendin e punës janë ato që vrasin cdo ditë shpresën.”
Ajo bëri thirrje për ndryshim të menjëhershëm me qëllim që të rinjve t’u jepet mundësia e punësimit këtu.
“Ne kemi nevojë emergjente për një strategji kombëtare ekonomike, kemi nevojë të ndajmë prioritetet kombëtare nga politika e ditës dhe kemi nevojë të kthehemi në vendin të mundësive dhe shanseve për të gjithë. Ndryshimi është i jetik dhe duhet të ndodhë tani!”
