Flakët që përfshinë malin e Shëngjinit kanë lënë pas dëme të mëdha në kurorën e gjelbër të zonës. Zjarri ka shkrumbuar sipërfaqe të konsiderueshme me pisha shumëvjeçare dhe bimësi, ndërsa gjatë gjithë natës forcat zjarrfikëse në bashkëpunim me emergjencat civile, punuan pa ndërprerje për të vënë nën kontroll flakët.
Vatra aktive u zhvendos në anën jugore të malit, ku ekipet zjarrfikëse vijuan ndërhyrjen e tyre për të shmangur përhapjen e flakëve drejt zonave të banuara, megjithatë terreni i vështirë dhe temperaturat e larta e vështirësuan situatën.
“Realisht situata është e vështirë, por të gjitha forcat janë këtu: forcat e policisë dhe të gjithë punonjësit e bashkisë. Terreni nuk është i favorshëm, ka gurë që bien dhe era është në disfavorin tonë. Megjithatë, janë gjashtë mjete zjarrfikëse, bashkë me efektivët, të cilët po punojnë për shuarjen e zjarrit”, tha Agustin Pepkolaj – Specialisti i Drejtorisë së Përgjithshme të Shërbimit Zjarrfikës.
Fatmirësisht nuk raportohen banesa të rrezikuara apo persona të lënduar, ndërsa autoritetet vijojnë monitorimin e zonës për të shmangur riaktivizimin e zjarrit.,
“Deri më tani nuk kem objekte të cilat janë të dëmtuara. Nuk kemi zjarrfikës ose të tjerë të lënduar”, tha Pepkolaj.
Ndërsa flakët janë vënë pjesërisht nën kontroll demi llogaritet të jetë i madh.
Sipërfaqe të tëra me pyje dhe bimësi janë shkatërruar, ndërsa autoritetet do të vijojnë operacionin, deri në shuarjen e plotë të zjarrit.
