Vijon fluksi i lartë i shtetasve shqiptarë që po kthehen drejt Greqisë pas festave të fundvitit.
Qindra emigrantë janë regjistruar gjatë orëve të fundit në pikën e kalimit kufitar të Kapshticës, duke krijuar radhë dhe pritje, kryesisht në tokën neutrale mes dy vendeve.
Siç shihet edhe nga pamjet, shumë udhëtarë po presin për të kaluar në doganën greke e më pas për t’u drejtuar drejt Greqisë, ku jetojnë dhe punojnë prej vitesh.
Aktualisht, pala greke po operon me 2 sportele në hyrje dhe 2 në dalje, ndërsa pala shqiptare po punon me 4 sportele në dalje dhe 2 në hyrje.
Në doganën shqiptare nuk paraqiten radhë, pavarësisht fluksit të lartë, pasi autoritetet po punojnë me kapacitet maksimal.
Ndryshe paraqitet situata në anën greke, ku për shkak të numrit më të kufizuar të sporteleve janë krijuar pritje.
Sipas të dhënave zyrtare, vetëm gjatë ditëve të para të muajit janar, përmes pikës së kalimit kufitar të Kapshticës kanë dalë mbi 20 mijë shtetas shqiptarë. Fluks i konsiderueshëm është regjistruar edhe në pikën kufitare të Qafë Thanës, ku kanë dalë rreth 8 mijë persona.
Autoritetet kufitare bëjnë apel për udhëtarët që të tregojnë durim dhe të ndjekin udhëzimet e policisë, ndërsa pritet që fluksi i lartë të vijojë edhe në ditët në vijim.
