Gati një vit nga caktimi i masës së sigurisë, që e detyron të paraqitet dy herë në muaj në SPAK, Sali Berisha nga Prokuroria e Posaçme nuk i ndali akuzat ndaj kryeprokurorit të mëparshëm, Altin Dumani.
“Altin Troplini instaloi në mënyrën më kriminale, praktikën staliniste të arrestimeve pa prova dhe të krijimit të provave pas arrestimeve. Kjo është faqja e zezë që ai hapi në këtë institucion dhe për të cilën ai do të bëhet përgjegjës deri ditën e fundit të jetës së tij. Ai iku, por ligji nuk iku”, tha Berisha.
Megjithatë, ish-kryeministri i vendit i vënë nën akuzë për korrupsion pasiv, deklaroi se interesi i tij i vetëm është zbatimi i ligjit.
“Qëndrimi im ndaj çdo punonjësi të Prokurorisë Speciale, Gjykatës Speciale, policisë, BKH-së është qëndrimi që ata do të mbajnë ndaj ligjit. Ne nuk kërkojmë absolutisht asgjë tjetër, veç se zbatimin e ligjit. Drejtuesi i ri, e thashë dhe njëherë, çdo drejtues dhe punonjës i këtij institucioni që zbaton ligjin, ka dhe do të ketë vlerësimin dhe mbështetjen e plotë të opozitës shqiptare”, tha Berisha.
Sali Berisha akuzohet nga Prokuroria e Posaçme se vuri aparatin shtetëror në funksion të përfitimeve të dhëndrit të tij përmes privatizimit të ish-klubit sportiv Partizani.
Që nga vënia e tij nën hetim bashkë me Jamarbër Malltezin beteja e tij ligjore ka qenë e ashpër ndaj SPAK dhe dy hetuesve, Arben Kraja dhe Enkeleda Millonai, po ashtu edhe ndaj gjyqtares që i caktoi masën e sigurisë, Irena Gjoka.
Ai e akuzon atë se ka fshehur një dënim në shtetin grek, të cilin e fakton me dëshminë e saj të penalitetit, që sipas kreut të PD, ka vulë apustile.
Tashmë dosja i është nënshtruar procesit gjyqësor, ndërsa pritet që seanca e ardhshme të jetë në datën 12 janar.
