Ministrat e Jashtëm nga Mbretëria e Bashkuar, Franca dhe Gjermania do të takohen me homologun e tyre iranian, Abbas Araqchi, në Gjenevë këtë pasdite, me qëllim krijimin e një rruge për t’u rikthyer në diplomaci mbi programin e saj bërthamor, ndërsa asnjëra nga palët në konflikt nuk pranon të tërhiqet.
Takimi vjen një ditë pasi Presidenti i SHBA-së, Donald Trump, dha një afat dyjavor për të vendosur nëse SHBA-të do t’i bashkohen luftës së Izraelit kundër Iranit, në mënyrë që të lejohet vazhdimi i negociatave.
Bisedimet e fundit bërthamore midis Iranit dhe SHBA-së dështuan kur Izraeli nisi sulmin një javë më parë.
Shtëpia e Bardhë tha se presidenti amerikan do të merrte një vendim nëse do ta sulmonte Iranin brenda dy javësh dhe se ende kishte shpresë për negociata.
Bisedimet do të mbahen në Gjenevë, ku në vitin 2013 u arrit një marrëveshje fillestare midis Iranit dhe fuqive botërore për të frenuar programin e tij bërthamor.
Një zyrtar iranian tha se Teherani gjithmonë e ka mirëpritur diplomacinë, por i kërkoi treshes europiane të përdorë të gjitha mjetet e disponueshme për të ushtruar presion mbi Izraelin për të ndaluar sulmet ndaj Republikës Islamike.
Ndërkohë, Izraeli deklaroi hapur mbështetjen e tij për ndryshimin e regjimit në Iran, me ministrin e Mbrojtjes që tha se udhëheqësi suprem i Iranit, Ajatollah Ali Khamenei, nuk mund të lejohet më të ekzistojë.
Faktorë të tjerë ndërkombëtarë kanë kërkuar gjithashtu ulje në tryezën e bisedimeve, duke paralajmëruar se ndryshimi i regjimit në Teheran do të ishte i papranueshëm.
“Rusia do të reagonte shumë negativisht nëse Ajatollah Ali Khamenei do të vritej. Situata është jashtëzakonisht e tensionuar dhe e rrezikshme jo vetëm për rajonin, por edhe globalisht”, tha Dimitry Peskov, Zëdhënës i Kremlinit.
Edhe presidenti turk Rexhep Taip Erdogan reagoi, duke thënë se lufta mes dy vendeve mund të ketë një ndikim të dëmshëm për emigrimin në Evropë.
/vizionplus.tv
