Policia e Tiranës ka finalizuar pas disa javësh hetime me metoda proaktive operacionin e koduar “Barriera”, duke goditur një rast të trafikimit të armëve të zjarrit nga Kosova drejt zonës së Freskut. Në kuadër të këtij operacioni janë sekuestruar 12 armë pistoleta dhe municion luftarak, ndërsa është arrestuar në flagrancë shtetasi Dugagjin Berisha, 27 vjeç, banues në Kosovë.
Operativi u zhvillua në dalje të Unazës së Madhe, pranë mbikalimit të Tufinës, ku policia lokalizoi mjetin e dyshuar dhe ndërhyri duke ndaluar Berishën. Efektivët e Komisariatit nr. 4 kishin informacion se ai do të transportonte armët drejt Tiranës dhe më pas Freskut për t’i shitur.
Operacioni u mbështet gjithashtu nga agjentë të infiltruar, të cilët kishin blerë më parë dy pistoleta në Fresk për të dokumentuar aktivitetin e paligjshëm të tij. Hetimet po vazhdojnë për identifikimin dhe kapjen e personave të tjerë të përfshirë në këtë rrjet trafikimi.
Materialet procedurale janë dërguar pranë Prokurorisë së Tiranës për veprime të mëtejshme ligjore. Ky operacion është një tjetër goditje e rëndësishme në kuadër të parandalimit të trafikimit të armëve të zjarrit në vend.
/vizionplus.tv
