Në qarkun e Durrësit janë finalizuar dy operacione të njëkohshme nga strukturat e DVP Durrës dhe Policia Kufitare, që kanë goditur disa veprimtari kriminale të ndryshme, përfshirë shitjen e lëndëve narkotike, kontrabandën e mallrave, mosdeklarimin e sendeve me vlerë dhe ndihmën për kalim të paligjshëm të kufirit.
Gjatë operacioneve, të koduara “The Hill” dhe “Transportimi”, janë sekuestruar sasi kokainë dhe cannabis sativa, 4 gurë të dyshuar të çmuar (diamantë), shuma parash në euro dhe lekë, 1 automjet dhe 12 celularë. Në total, janë arrestuar 3 shtetas, ndërsa 5 të tjerë po procedohen në gjendje të lirë.
Në operacionin “The Hill”, policia arrestoi një shtetas dhe nisi procedim për një tjetër, të dyshuar për shpërndarje të drogës në doza në qytetin e Durrësit. Gjatë kontrolleve u sekuestruan dhjetëra doza kokaine dhe kanabis, si dhe celularë të përdorur për aktivitetin kriminal.
Ndërkohë, në operacionin “Transportimi”, në Pikën e Kalimit Kufitar të Portit të Durrësit, u arrestua një shtetas nga Patosi, pasi iu gjetën 4 gurë të dyshuar të çmuar pa dokumentacion, së bashku me para dhe sende të tjera të sekuestruara. Po ashtu, një tjetër shtetas u arrestua pasi në automjetin e tij u gjet kokainë dhe u identifikuan 4 pasagjerë që dyshohet se janë ndihmuar për kalim të paligjshëm të kufirit, të cilët janë proceduar penalisht.
Materialet procedurale i janë referuar Prokurorisë së Durrësit për vijimin e hetimeve.
/vizionplus.tv
