Shtetet e Bashkuara të Amerikës kanë hequr statusin “non grata” për kryetarin e Partisë Demokratike Sali Berisha.
Burime nga Partia Demokratike konfrimojnë për Vizion Plus se vendimi i Departamentit të Shtetit i është komunikuar kryetari të PD Berisha në një bisedë telefonike nga e ngarkuara me punë e SHBA-së Nancy Van Horn.
Deputeti demokrat Belind Këlliçi e cilësoi vendimin si një lajm të mirë për demokratët dhe për Shqipërinë, duke e konsideruar shpalljen “non grata” një padrejtësi të nxitur, sipas tij, nga kryeministri Edi Rama. Këlliçi e lidhi gjithashtu këtë zhvillim me klimën e krijuar nga protestat e fundit qytetare.
Nga ana tjetër, kreu i Grupit Parlamentar të PS-së, Taulant Balla gjatë fjalës së tij në Kuvend u shpreh skeptik ndaj lajmit, duke deklaruar se nuk komenton biseda telefonike apo informacione jozyrtare. Ai ironizoi përpjekjet e opozitës për ta paraqitur këtë si një sukses të protestës dhe theksoi se do të mbajë qëndrim vetëm pasi të ketë një njoftim zyrtar nga autoritetet amerikane.
Këlliçi: Sot është një ditë e mirë, është një lajm i mirë për gjithë qytetarët shqiptarë. Një padrejtësi shumë e madhe që nuk ka rënë vetëm mbi demokratët por mbi këtë vend. Një padrejtësi e madhe e lobuar nga Edi Rama i cili nuk ka lënë mekanizëm, para dhe lobim për të goditur opozitën. Protesta është e paprecedentë. Dhjetëra të rinj kanë mbushur sheshin me kërkesa, e para “dorëheqja e qeverisë”. Shumë shpejt slogani i ri do të jetë “Rama në burg, Berisha në Uashington”.
Balla: Thatë që protesta ia arriti qëllimit, u hoq non grata. Ndryshove dhe sloganin. Thua që protestuesit sotne nuk do thërrasin më Berisha në burg, por Berisha në Uashington. Jeni bërë si telefon i prishur. 7031/c mbi të cilën Berisha është shpallur non grata, për mendimin tim është vështirë të hiqet. Unë do ta komentoj kur të ketë një njoftim zyrtar. Unë nuk komentoj biseda telefonike. Fakti që vini këtu dhe e shisni si sukses të protestës një gjë të tillë…kot lodheni ta vidhni protestën. Jo Sali Lushën të çoni në protestë, jo të gjithë të shkoni në protestë ne kemi një mandat për të qeverisur vendin, kemi një mandat për të përmbyllur marrëveshjen për anëtarësim të Shqipërisë në BE. Ju kemi mundur dhe do t’iu mundim më thellë në 2029.
