Është zbardhur kërkesa që SPAK i ka drejtuar ditën e sotme Kuvendit të Shqipërisë, ku i kërkon heqjen e imunitetit të deputetit zv.kryeministres Belinda Balluku, për t’i hapur më pas rrugë arrestimit.
Në kërkesën e firmosur nga kreu aktual i SPAK, Altin Dumani, i cili është në ditët e fundit të mandatit të tij në krye të institucionit, Prokuroria e Posaçme i kërkon Kuvendit që t’i hapë rrugë arrestimit me burg zv.kryeministres Belinda Balluku.
Kërkesa e SPAK:
Kërkesë për dhënien e autorizimit nga Kuvendi për arrestimin/heqjen e lirisë së deputetit/ministrit/zëvendëskryeministrit, nëpërmjet zëvendësimit të masës së sigurimit.
Drejtuar: Z. Niko PELESHI
KRYETAR I KUVENDIT TË REPUBLIKËS SË SHQIPËRISË
KUVENDIT TË REPUBLIKËS SË SHQIPËRISË
I nderuar z. Kryetar i Kuvendit, TIRANË
Të nderuar Deputetë të Kuvendit, TIRANË
Mbështetur në nenet 73, 95,103 të Kushtetutës së Republikës së Shqipërisë, nenet 260, 288, 289 të Kodit të Procedurës Penale, si dhe në Rregulloren e Kuvendit të Republikës së Shqipërisë, nenet 13 dhe 118, bashkëlidhur ju përcjellim kërkesën për dhënien e autorizimit nga Kuvendi i Republikës së Shqipërisë, për arrestimin/heqjen e lirisë së deputetit/ministrit/zëvendëskryeministrit Belinda BALLUKU, nëpërmjet zëvendësimit të masës së sigurimit personal nga ajo e “Ndalimit të daljes jashtë shtetit” e parashikuar nga neni 233 i K.Pr.Penale dhe “Pezullimit të ushtrimit të një detyre a shërbimi publik”, e parashikuar nga neni 242 i K.Pr.Penale, në atë të arrest në burg/në shtëpi, parashikuar nga nenet 238/237 të K.Pr.Penale, në kuadrin e procedimit penal nr.136 të vitit 2025, të Prokurorisë së Posaçme kundër Korrupsionit dhe Krimit të Organizuar.
Gjithashtu, në respektim të nenit 288, pika 2, të Kodit të Procedurës Penale, bashkëlidhur gjeni relacionin e arsyetuar, të shoqëruar me provat përkatëse, si dhe urdhrin për ruajtjen e sekretit hetimor dhe ndalimin e publikimit të akteve, datë 16.12.2025.
Duke ju falenderuar për bashkëpunimin.
Kujtojmë që më herët GJKKO ka vendosur masën e ndalimit të daljes jashtë vendit për zv.kryeministren Balluku, si dhe atë të pezullimit nag detyra, por që më pas u rrëzua nga Gjykata Kushtetuese.
