Kuqezinjtë e Turqisë janë për momentin aseti kryesor i trajnerit Silvinjo, i cili është futur në ditët e rëndësishme të planifikimit në detaj të duelëve të play-off-it që mund të na japin mundësinë e realizimit të një ëndrre të madhe, atë të kualifikimit në Kupën e Botës. Dueli gjysmëfinal kundër Polonisë më 26 mars në Varshavë, e ndoshta edhe një sfidë e mundshme finale nëse kalojmë me sukses këtë përballje të parë, do të vendosin me siguri edhe fatet e Silvinjos në përfaqësuesen tonë, pasi një dështim i mundshëm do të divorconte përfundimisht stafin teknik me Federatën Shqiptare të Futbollit.
Fokusi, sidoqoftë, është te përgatitja e duel it me polakët. Të gjithë e dinë që Silvinjo është besnik, madje më shumë sesa duhet, i ideve të tij dhe ndryshon shumë pak edhe kur zhvillimet rreth tij janë të rëndësishme. Fjala vjen, të gjithë janë kuriozë të kuptojnë se si do të sillet ai me Ernest Muçin dhe Anis Mehmetin.
I pari i ka lënë të gjithë pa fjalë me performancën te Trabzonspor. 31 ndeshje, 13 gola dhe 6 asiste për fantazistin kuqezi. Shifra që s’kanë nevojë për koment e që për një kombëtare si Shqipëria janë luks. Në suksesin e fundit 3-1 kundër Karagümrük, ai ishte ndër më të mirët në fushë dhe për këtë arsye u zgjodh edhe në formacionin më të mirë të javës së 24-t të Superligës turke, në krah të Viktor Osimhen.
E njëjta situatë është edhe për Anis Mehmetin. 25-vjeçari, dikur pjesë e kombëtares, po bën një sezon fantastik, kurorëzuar edhe me një transferim të rëndësishëm nga Bristol City tek Ipswich Town. Në fundjavë shënoi në fitoren e fundit të Ipswich kundër Swansea, duke shkuar në kuotën e 11 golave e 8 asisteve në Championship, kampionat i fortë dhe i pakrahasueshëm me disa liga të tjera ku luajnë kuqezinjtë.
Prania e tyre në kombëtare duket e pashmangshme po të kemi parasysh edhe problemet me lojtarë të tjerë. Fjala vjen, Armando Broja, që sipas trajnerit të Burnley do të mungojë edhe disa javë si pasojë e një dëmtimi, apo edhe Mirlind Daku që është zhdukur nga radarët e golave. Jasir Asani, me ndërprerjen e kampionatit në Iran, është hall më vete. Dhimbje koke për trajnerin jep edhe Elseid Hysaj, edhe ai me probleme fizike, sikurse edhe Medon Berisha që ende nuk e ka marrë veten nga dëmtimi te Lecce.
Thënë këto, Silvinjo duhet të lutet që të paktën emra të tjerë si Rey Manaj apo Uzuni të vazhdojnë të realizojnë sikurse kanë bërë javët e fundit, në mënyrë që të jenë garancia e teknikut për sfidën e rëndësishme në Varshavë.
