Anëtari i kryesisë së Lëvizjes Vetëvendosje, Xhelal Sveçla është shprehur se fajtorët e vetëm për mosantarësimin e Kosovës në Organizatën Ndërkombëtare të Policisë, janë lidërët që udhëheqin Kosovën.
Përmes një konference për mediat ai ka theksuar se Hashim Thaçi pavarësisht situatës në terren vazhdon të vrapojë pas pazareve me Serbinë, e cila si asnjëherë më parë pas shpalljes së pavarësisë po e lufton shtetësinë dhe subjektivitetin e vendit.
Ndër të tjera ai ka thënë se hapi i parë që dëshmon se palët janë të interesuara për një marrëveshje finale është pushimi i “luftës” në terren.
“Si është e mundur që shteti i Kosovës të përballet me këso vështirësish në terren a presidenti Thaçi të shkojë e të takohet pa asnjë kusht për Serbinë? Ky president po anashkalon çdo interes të vendit vetëm që personalisht të shpëtojë. Ai e ka zgjedhur rrugën e tij, por nuk duhet dhe nuk guxon ta marrë edhe Kosovën me vete. Ky njeri është zhvendosur kah pala serbe”.
Nga ana tjetër deputetja, e cila përfaqëson këtë parti, Albulena Haxhiu ka folur për konfuzionin që kanë shkaktuar Presidenti i Kosovës, Hashim Thaçi, kryeministri i Kosovës, Ramush Haradinaj dhe ministri i Punëve të Jashtme, Behgjet Pacolli me siç është shprehur dobësinë e treguar karshi Serbisë ndaj shteteve që tashmë e kanë njohur pavarësinë e Republikës së Kosovës.
Kosova nuk ka arritur të bëhet vend anëtar i INTERPOL-it, pasi që nuk mori shumicën e nevojshme, prej dy të tretave të votave të vendeve pjesëmarrëse në Asamblenë e Përgjithshme të kësaj organizate, që po mbahet në Dubai.
