Këtë të mërkurë do të hyjnë në fuqi masat e reja për frenimin e përhapjes së koronavirusit. Ndalimi i qarkullimit nis në orën 22:00 deri në 06:00 të mëngjesit.
I ftuar në edicionin qendror të lajmeve në “Vizion Plus”, drejtori i Urgjencës Kombëtare, Skënder Brataj theksoi se situata në vendin tonë ndodhet nën kontroll, duke mohuar akuzat e shumta të opozitës që spitalet COVID po shkojnë drejt kolapsit.
“Lokali i natës është vendi i grumbullimit të njerëzve dhe mosrespektimit të masave. Grumbullimi i burimeve të infeksionit janë disa nga këto shërbime, lokalet e natës, ku njerëzit janë ngjitur me njëri-tjetrin. Situata është nën kontroll. Kemi përcaktuar disa skenarë. Pse politika duhet të ngatërrohet me shëndetin e njerëzve? Nuk duhet të transmetohet një mesazh i gabuar, njerzit duan të dinë në këtë moment gjëra më të thjeshta.”
Sa iu përket të dyshuarve me COVID, Brataj tha se duhet të trajtohen në fazën e parë vetëm me mjekim simptomatik: paracetamol, vitamina dhe lëngje.
“Tamponi është diagnostikues, nuk ndikon fare as në prognozë as në ecurinë e sëmundjes. Një person që bën tamponin është i dyshuar, ose ka shenja. Përderisa i bëhet tamponi, konsiderohet i sëmurë. Në momentin që i bëhet tamponi, duhet të izolohet dhe të mjekohet për fazën e parë. Kjo fazë është 5 deri në 7 ditë dhe duhet të bësh vetëm mjekim simptomatik. Nuk duhet të marrë antivirale, thjesht paracetamol, vitamina, lëngje.”
I pyetur pse nuk ka një protokoll mjekësor të unifikuar, Skënder Brataj sqaroi se nuk ka një trajtim specifik për COVID.
“Gjithë bota nuk ka protokoll. Kemi udhëzues. Një mjekim etiologjik për Covid-in nuk ka. Një antiviral mendohet që ndihmon. Kjo sëmundje ka një mjekim simptomatik. Sa i përket mënyrë së trajtimit, çdo njeri ka një eksperiencë të vetën. Janë medikamente të autorizuara.”
