Një panel ekspertësh që këshillon Bashkimin Evropian për mbrojtjen e fëmijëve në internet ka rekomanduar që fëmijët nën moshën 13 vjeç të kenë qasje në rrjetet sociale vetëm nën mbikëqyrjen e prindërve ose në ambientet shkollore. Raporti u prezantua ditën e sotme në Bruksel.
Presidentja e Komisionit Evropian, Ursula von der Leyen, njoftoi se pas verës Komisioni do të paraqesë propozime ligjore për rregullimin e përdorimit të rrjeteve sociale nga fëmijët.
Paneli, i përbërë nga mjekë, akademikë, përfaqësues të të rinjve dhe prindër, rekomandon që foshnjat dhe fëmijët e vegjël të mos ekspozohen fare ndaj ekraneve.
Për fëmijët nga mosha 3 deri në 12 vjeç sugjerohet përdorimi i pajisjeve dhe i rrjeteve sociale të përshtatshme për moshën vetëm nën mbikëqyrje, ndërsa adoleshentët nga 13 deri në 18 vjeç të kenë përdorim gradualisht më të pavarur të platformave digjitale që ofrojnë masa të forta sigurie.
Duke folur gjatë prezantimit të raportit, Ursula von der Leyen theksoi se fëmijët kanë nevojë për më shumë kohë në botën reale për të luajtur, krijuar miqësi dhe zhvilluar personalitetin e tyre, pa u ndikuar nga algoritmet e rrjeteve sociale.
“Kjo nuk ka të bëjë me pyetjen nëse fëmijët mund të kenë qasje në rrjetet sociale, por me faktin nëse dhe kur rrjetet sociale duhet të kenë qasje te fëmijët tanë”, u shpreh ajo.
Komisioni Evropian po shqyrton mundësinë e vendosjes së kufizimeve të reja në nivel të BE-së, duke marrë si shembull modelin e Australisë, e cila në fund të vitit 2025 u bë vendi i parë që vendosi një kufi minimal moshe për përdorimin e rrjeteve sociale.
Megjithëse platformat e mëdha online janë tashmë të detyruara të zbatojnë masa për mbrojtjen e fëmijëve sipas Aktit për Shërbimet Digjitale (DSA), ekspertët vlerësojnë se zbatimi i këtyre rregullave duhet të jetë më i fortë.
Javën e kaluar, Komisioni Evropian konstatoi se kompania Meta, pronare e Facebook, Instagram dhe WhatsApp, ka shkelur rregullat e DSA-së për shkak të dizajnit që nxit varësinë nga platformat e saj, duke shkaktuar pasoja të dëmshme edhe për përdoruesit e mitur.
