Franca i ka cilësuar si të pabaza akuzat ruse se Ukraina po kërkon të sigurojë një armë bërthamore ose një “bombë të ndyrë” me ndihmën e Londrës ose Parisit, duke i quajtur akuzat një shembull të dezinformimit rus.
Në një deklaratë të lëshuar me rastin e katërt përvjetorit të luftës, SVR, shërbimi i inteligjencës së jashtme i Rusisë, tha se Britania dhe Franca besojnë se Kievi mund të sigurojë kushte më të favorshme nëse do të zotëronte “një bombë bërthamore, ose të paktën një të ashtuquajtur ‘bombë të ndyrë’ “.
Drejtoresha e komunikimit në Ministrinë franceze të Mbrojtjes, Olivia Penichou, tha se “kjo deklaratë e pabazuar nga SVR u riprodhua nga propagandistë të ndryshëm rusë në X dhe nga disa agjenci lajmesh të huaja”.
Ajo shtoi se “Federata Ruse shpesh përdor dezinformimin për të kultivuar një klimë mosbesimi ndaj veprimeve të Francës dhe partnerëve të saj në favor të Ukrainës. Kjo përpjekje e fundit është një shembull tipik.”
Zyrtarja theksoi se Parisi i përmbahet angazhimeve të tij ndërkombëtare, veçanërisht atyre që kanë të bëjnë me Traktatin për Mospërhapjen e Armëve Bërthamore.
Po ashtu, Franca iu përgjigj edhe komenteve të zëdhënëses së Ministrisë së Jashtme ruse, Maria Zakharova, e cila tha se çdo vendosje e trupave britanike në Ukrainë do ta zgjaste luftën.
Zëdhënësi i Ministrisë së Jashtme franceze, Pascal Confavre, tha: “Rusia është ajo që po e zgjat atë me agresionin e saj.”
