Kjo verë mund të konsiderohet si vera e aksioneve, ku bizneset në disa drejtime po hasen me nisma për të goditur paligjshmërinë.
Aksionet për lirim të hapësirave publike, aksion për ndërtime pa leje, aksion për sigurinë ushqimore, aksion për faturimin e produkteve të bulmetit. Të gjitha nismat janë të mirëpritura, por ato rrezikojnë të mbeten “aksione vere” pa efekte afatgjatë, nëse nuk shoqërohen me reforma.
“Aksionet në vetvete nuk janë negative. Ato shërbejnë si një shtysë për të çuar përpara punët. Por në vendin tonë, ne kemi parë që thuajse çdo vit ka një aksion në një fushë të caktuar. Shqetësimi kryesor është që aksionet janë kthyer në normë dhe nuk janë më një përjashtim. Kjo atmosferë nuk i shërben klimës së të bërit biznes”, tha Ergis Sefa, ekspert ekonomie në Vizion Plus.
Përkundrazi, aksione të tilla kanë efekt negativ. Ato stepin nismat për të hapur një aktivitet biznesi duke krijuar dhe klimë pasigurie.
“Teksa sheh këto aksione në çdo biznes që ka investuar, në shkelje apo jo, që zyrat e shtetit e kanë lënë ta kryejë atë investim dhe një ditë kujtohen se janë të paligjshme, janë dëshmi se shteti ka mangësi të theksuara funksionimi. Në një atmosferë të tillë bizneset janë në pasiguri, a ja vlen të investosh apo jo? Aksionet janë dëshmi se të bësh biznes nevojiten rregulla të qarta loje në treg, që në Shqipëri mungojnë”, sqaroi Sefa.
Në të gjitha anketimet që janë kryer ndaj sipërmarrjes, shqetësimi më i madh nuk lidhet me barrën e taksave, por lidhet me ndryshimet e shpeshta ligjore të cilat krijojnë amulli në treg duke e bërë situatën të paqartë. E në një treg të paqartë askush nuk merr guximin të investojë.
/vizionplus.tv
