Pandemia e Covid-19 , përveçse shkaktoi një numër dramatik viktimash, ka shkaktuar një tronditje të thellë në shumë marrëdhënie. Gjatë izolimit u rrit numri i dhunës fizike dhe emocionale.
Dashuria në çift mund të kthehet në urrejtje. Ndonjëherë urrejtje e fortë. Por si është e mundur mes dy individëve që kanë zgjedhur njëri-tjetrin, që së bashku kanë vendosur të krijojnë një familje, të ecin së bashku të shfaqet papritmas urrejtja?
Asnjë çift nuk është i imunizuar nga vështirësitë, përplasjet, krahasimet, frakturat pak a shumë të thella. Por në çdo marrëdhënie “të shëndoshë” ekziston vullneti për të kuptuar, për të riparuar, për t’u penduar, për të rikuperuar.
Megjithatë, kur zhgënjimi, akuzat dhe poshtërimi grumbullohen në një marrëdhënie, kur shfaqen anët “të sëmura” të njërit ose të dy partnerëve, dashuria mund të zëvendësohet nga urrejtja.
“Nuk e njoh më!”, “Nuk është personi me të cilin jam martuar”, “Më nxjerr më të keqen” , fraza të këtij lloji shprehin të gjithë shqetësimin e atyre që e shohin marrëdhënien e tyre si çift në ndryshim dhe për pasojë ndjenjat e tyre.
Shkaqet e mutacionit
Tradhtitë, refuzimi, braktisja, dhuna fizike apo emocionale, përbuzja ndaj familjes, vjehrrit, miqve të partnerit… janë disa nga “goditjet” më të shpeshta dhe nga të cilat është më e vështirë të rikuperosh.
“Ai është bërë përbindësh”, “Nuk e di me kë jam martuar”, dëgjojmë nga ata që përjetojnë situata të këtij lloji në jetën e tyre në çift dhe që të çojnë në ndjenja të tjetërsimi. Kur këto ndjenja transferohen te fëmijët, ndodh një dështim i vërtetë në mekanizmat e “identifikimit”. Nuk mund ta identifikosh më tjetrin si të afërm.
Por urrejtja në një çift mund të veprojë në mënyrë paradoksale si një ngjitës dhe lidhjet e këtij lloji janë vërtet të vështira për t’u zgjidhur.
Rëndësia e parandalimit
Kjo është arsyeja pse është e rëndësishme, krahas masave mbrojtëse që duhet të merren në këto raste, të punohet edhe në parandalimin. Ofroni çifteve mjetet e nevojshme për të kuptuar pse janë të burgosur të “ciklit të dhunës”, pse ai përsëritet dhe cilët janë shkaktarët e saj. Dhe në një moment si ky aktual, tashmë plot kërcënime të jashtme, inkurajimi i rimëkëmbjes së atyre lidhjeve të çifteve me probleme serioze, parandalimi i situatës nga degjenerimi, është thelbësor.
