Lideri historik i PD, Sali Berisha, e ka cilësuar kërkesën e SPAK-ut për t’i hequr lirinë si një sulm kundër opozitës. Gjatë një konference me gazetarët, Berisha theksoi se ashpërsimit të masës së sigurisë ndaj tij, opozita do t’i përgjigjet me përshkallëzim të aksionit politik, edhe pse vetë Berisha duket se do të jetë i detyruar të qëndrojë në shtëpi.
“Qëllimi i kësaj është pikërisht kjo, një goditje ndaj opozitës, nuk është puna goditje ndaj Sali Berishës. Është puna goditje ndaj opozitës. Opozita do i përgjigjet me të gjitha mjetet e mosbindjes civile të gjithë valës së represionit kundra saj.”, tha Berisha.
Lexo edhe :
Berisha përsëriti akuzën se prokuroria e posaçme është nën urdhrat e kryeministrit Edi Rama. Sipas Berishës, SPAK-u duhet të merrte lejen e parlamentit që në momentin që kërkoi për të masën e sigurisë “detyrim paraqitje”.
“Kjo është shprehja më tipike e partisë-shtet, ku prokuroria, gjykatësi, parlamenti, kryeministri të gjithë janë një në dorë të kryeministrit. U porositën për atë rrugë, nuk u eci, se natyrisht nuk mund të bija në gabime të rënda dhe t’i vija vetes shkeljen e Kushtetutës, atë nuk mund ta bëja. Jam ish-president, ish-kryeministër, kam zbatuar ligjet gjithë jetën time. Tani po përligjin atë akt antikushtetues që kanë ndërmarrë. Duke thënë këtë, natyrisht unë jam personi që në vitin 2012 kam dërguar në parlament ligjin e abrogimit të çdo mbrojtje për deputetët para drejtësisë. Unë kam kërkuar që deputetët të jenë të njëjtë me qytetarët e tjerë. Në këtë kontekst, cilido të jetë vendimi i parlamentit, unë do e zbatoj.”, shtoi Berisha.
Këshilli i mandateve do të mblidhet të hënën për të vendosur për fatin e imunitetit të liderit të opozitës Berisha, por vete Berisha ende nuk ka vendosur a do të marrë pjesë në mbledhje.
“Nuk kam marrë akoma vendimin e avoketerëve se si do veproj ditën e hënë në mbledhjen e Këshillit të Mandateve. Atë që kemi vendosur si grup parlamentar, ne do vazhdojmë mosbindjen civile pavarësisht nga çdo lloj procedure të diktuar nga Edi Rama.”, deklaroi ish-kryeministri.
Javën e ardhshme pritet që parlamenti të autorizojë prokurorinë të ashpërsojë masën e sigurisë ndaj liderit të opozitës Sali Berisha dhe deri tani është e qarte se opozita në atë séancë do të vazhdojë protestën kundër qeverisë e nuk do të marrë pjesë në votim./vizionplus.tv
