Koncesioni i sterilizimit/ Arrestohet me urdhër të SPAK ish zëvëndës ministri i Shëndetësisë, lëshohen 8 urdhër arreste

Arrestohet ish- zëvendës ministri i Shëndetësisë, Klodian  Rrjepaj i dyshuar për abuzime me koncesionin e sterilizimit.

Prokuroria konfirmoi masën e sigurisë arrest në burg për të, e po ashtu edhe për biznesmenin, Ilir Rrapaj. Ndaj të parit, SPAK ka ngritur akuzën e falsifikimit dhe shpërdorimit të detyrës, ndërsa ndaj të dytit, atë të mashtrimit me pasoja të rënda.

Nën hetim, me kërkesë të gjykatës, është vendosur edhe ish-ministri i Shëndetësisë, Ilir Beqaj, por dosja ndaj tij është ndarë dhe hetimet po kryhen paralel.

Në total janë lëshuar 8 urdhër arreste për zyrtarë të ministrisë së shëndetësisë. Për drejtorin ekonomik, Saimir Kadiu dhe drejtoreshën juridike, Marsela Serjanaj SPAK ka kërkuar arrest shtëpie.

Ndërsa, në masën e sigurisë detyrim paraqitje do të qëndrojë shefi i kirurgjisë në QSUT, Arben Gjata si dhe zyrtarët Pertef  Mersini, Genc Burazeri dhe Naile Ajazi, të akuzuar për falsifikim dhe shpërdorim të detyrës.

Për këtë dosje këtë të enjte u thirr në SPAK në cilësinë e dëshmitarit ish-ministri i Financave Shkëlqim Cani. Deklarimet e tij në lidhje me sterilizimin konsiderohen të rëndësishme, pasi gjatë kohës kur është nënshkruar kontrata ai ka qenë në krye të kësaj ministrie.

Ish ministri tha se me biznesmenin e prangosur, Ilir Rrapaj nuk ka patur njohje.

SHKËLQIM CANI

ISH-MINISTËR I FINANCAVE

Unë kam zbatuar ligjin dhe aktet nënligjore. Jam i hapur për çdo gjë. Punët e mia kanë qenë të bazuara te letrat. Ç’ne unë të njihesha me të! (biznesmenin Rrapaj)? Të më jepte dhe me mua ca para? Nga ta gjej unë këtë lidhje? Pse duhet ta njoh unë atë? Unë po e jap përgjigjen saktë. Jua thash shumë herë, po atë përgjigje kam. Kur ka nisur koncesioni kam ikur nga detyra…Janë plotësuar kërkesat sipas ligjit. Ju çfarë më kërkuar, këto janë përgjigje

Nga ana tjetër ish ministri i Financave garantoi se do jetë i gatshëm të përballet me organet ligjzbatuese.

SHKËLQIM CANI
ISH-MINISËR I FINANCAVE

Jam gati të përballem me drejtësinë. Kam qenë i hapur për çdo çështje. Unë kam dhënë përgjigje për ato që më ka kërkuar institucioni në zbatim të ligjit.

Me 10 dhjetor të vitit 2015, Ministria e Shëndetësisë lidhi një kontratë koncesionare 10-vjeçare me një kompani private për sterilizimin e pajisjeve mjekësore që përdoren për ndërhyrjet kirurgjikale.

Vlera e marrëveshjes përllogaritet në 100 milionë euro.

Po për të njëjtën dosje, prokurori Edvin Kondili ka marrë edhe dëshminë e ish- ministrit të Shëndetësisë Ilir Beqja, i cili për 9 orë rresht ka dhënë shpjegime për rolin e tij në këtë cështje.