Nga Paloka tek Albana Vokshi/ Nis votimi për shkarkimin e anëtarëve që ishin në Kuvendin e Berishës

Nis procesi i votimit në selinë blu nga anëtarët e Këshillit Kombëtar për të shkarkuar emrat që u propozuan një ditë më parë nga Kryesia e Partisë Demokratike. Procesi po realizohet në mënyrë të fshehtë.

Këto shkarkime u paralajmëruan nga kryedemokrati Lulzim Basha, pas mbajtjes së Kuvendit Kombëtar të mbledhur nga ish-kryeministri Sali Berisha.

Sekretari i Përgjithshëm Gazment Bardhi, u shpreh se sot nuk bëhen përjashtime, por shkarkim nga funksionet.

Gazment Bardhi: Sot nuk merret asnjë vendim për përjashtim, por për shkarkim nga funskionet. Disa anëtarë të kryesisë nuk kanë respektuar vendimin e kryesisë së Partisë për thirrjen në datën 18 të Kuvendit Kombëtar. Përkundrazi! Janë angazhuar për ngritjen e strukturave paralele për te zëvendësuar institucionet e ligjshme statutore të PD. Per ta nuk ka më kryetar partie, nuk ka sekretar të përgjithshëm, nuk ka nënkryetarë, nuk ka kryesi, nuk ka Këshill Kombëtar, perveç kësaj trupe që sillet si celulë ilegale që kërkon t’i mbivendoset istitucioneve legjitime të partisë. Për këtë arsye, ata mund të bëjnë çfarë të duan jashtë institucioneve të partisë, por nuk mund të veprojnë si anëtarë të kryesisë qendrore të PD. Ky është propozimi ndaj Këshillit Kombetar. Nuk po marrim masë disiplinore ndaj askujt, edhe pse interesi elektoral i PD me veprime të tilla, na jepte të drejtën e masave disiplinore sipas nenit 27. Për të mos i fryrë përçarjes, per të mos perjashtuar askënd, propozojmë shkarkimin nga funksionet.

Partia Demokratike ka listuar emrat e anëtarëve të kryesisë dhe sekretarëve për të cilët ka propozuar shkarkimin nga funksionet.

Fleta e votimit:

A jeni dakord me propozimin e kryesisë për shkarkimin e Kryetarit të Këshillit Kombëtar, Edi Paloka

Anëtarëve të kryesisë:

Flamur Noka
Aldo Bumçi
Gent Strazimiri
Albana Vokshi
Oerd Bylybashi

Si dhe sekretarëve:

Ervin Minarolli
Ivi Kaso
Belind Kelliçi
Ledina Mandia

Sot në Këshillin Kombëtar është miratuar një rezolutë, e cila e konsideron nul Kuvendin e 11 dhjetorit të thirrur nga ish-kryeministri, ndërsa vendimet e marra dje, ilegjitime.