Ministri i Mbrojtjes Ermal Nufi, në fjalën e tij në parlament foli për ngritjen e shoqërisë KAYO.
Nufi deklaroi se do të prodhohen produkte ushtarake për Forcat e Armatosura. Ai tha se do të krijohen produkte ushtarake të tilla si dronë, armë dhe municione.
“Shoqëria KAYO është konceptuar jo si kompani prodhuese, por qëllimi i saj është që bashkëpunon. Kështu të mund të prodhohen produkte ushtarake për Forcat Ushtarake apo eksport. Është model ndërkombëtar dhe duhet të angazhohen kapitale private që të ngrihet industri ushtarake. Shqipëria e njeh prodhimin ushtarak. Në të kaluarën kemi qenë thelbësisht të angazhuar në prodhimin e pajisjeve apo armëve në Republikën e Shqipërisë, ku janë prodhuar armë, municion dhe lëndë plasëse. Pasja e një kompanie shtetërore, që garanton pasjen e një rezerve municioni e linjave të reja në Republikë është domosdoshmëri në kuadër të sigurisë.
Patjetër që shoqëria funksionon me partneritet privat, sepse kapitalin e investojnë ata. Kemi marrëveshje dhe me Izraelin, që produktet e veta i të provuara në fushën e betejës. Do prodhojmë gjithashtu dronë”, tha Nufi.
Në fund të fjalës së tij, Nufi deklaroi se nga fabrikat që do të jenë në vend për prodhimin e municioneve, do të punësohen në vend 1000 persona. Sipas ministrit, shteti investon 3 milionë euro në shoqërinë KAYO dhe pritet të fitojë 300-400 milionë.
