Qeveria shqiptare po bëhet gati që të dalë në tregjet ndërkombëtare për të emëtuar eurobondin e radhës, i pesti ndër vite. Shuma që pritet të merret arrin në 500 mln euro. Por, kur pritet të finalizohet ky proces dhe pse qeveria po del këtë vit, ndërsa në buxhetin afatmesëm ishte parashikuar në vitin 2022?
“Të gjithë procesin do ta kemi gati në mes të tetorit. Dalja në tregje do të kushtëzohet nga dy elementë, së pari tregjet ndërkombëtare dhe luhatshmëria e tyre, dhe e dyta nevoja për mbulim të likuiditetit. Besoj se nëntori është një muaj shumë i mirë për të parë të dy këto elementë. Shuma do të jetë rreth 500 mln euro. Ne kishim parashikuar në projektbuxhetin afatmesëm të dilnim në 2022, por e kemi afruar. Kjo nuk do të thotë që po të kemi nevojë, të dalim përsëri në vitin që vjen. E gjitha ka lidhje me treguesit ekonomik. Sa më shumë injekesion në treg, aq më shumë ofrohet nxitje për të rritur ekonominë”, u shreh Denaj për emisionin “E-ZONE” në Vizion Plus.
