Një spektakël të trishtueshëm e ka cilësuar kryeministri shqiptar Edi Rama bllokimin e refugjatëve sirian në Greqi, gjatë nje takimi ne Tirane me ish-kryeministrin italian D’alema. Kreu i qeverisë shqiptare tha se vendi ynë është i gatshëm të japë kontribut, por nuk do të lejoje që Shqipëria të bjerë në kurth.
Edi Rama:
Mënyra se si u administrua kriza ishte kaotike. Ajo që ndodhi në Ballkan ishte një spektakël i trishtueshëm, pasi ishte përcjellje nga një stacion në tjetrin. Refugjatët hyjnë në BE, dalin në Maqedoni dhe hyjnë sërish në BE. Nuk ka zot që i mban në tenda, duan të shkojnë në Gjermani. Numri i refugjatëve nuk është dramë e madhe, por mënyra si shfaqen refugjatët është problem. Ne jemi gati të marrim pjesën tonë, por nuk mund të hapim portat dhe të ngecim në kurth.
Ndërsa ish-kryeministri italian Massimo D’alema ashtu si Rama tha se kjo krizë është një plagë në zemër të europës. Në fjalën e tij D’alema kujtoi edhe luftën në Kosovë, dhe mijëra persona që u larguan nga vendi si pasojë e kësaj luftë.
Massimo D’alema:
Italia i qëndroi pranë Shqipërisë në momentet e vështira, kur mijëra emigrantë shqiptarë iu drejtuan vendit. Për shkak të luftës në Kosovë patëm 300 mijë refugjatë. Europa duhet të kryejë ribashkimin e kontinentit. Duhet bashkëpunim për t’u përballur me krizën e emigrantëve.
Në këtë takim D’alema prezantoi për publikun shqiptar librin e tij të fundit në gjuhën shqipe “Jo vetëm euro: demokraci, punë, barazi”. Ai është ftuar për të qenë i pranishëm në kongresin e Partisë Socialiste. Ne prag te këtij kongresi, kryeministri Rama zhvilloi nje pritje te posaçme per delegatet dhe përfaqësues te tjerë te politikes nga Kosova, Maqedonia e Mali i Zi.
