Kryeministri i vendit Edi Rama ka reaguar pas një videoje të shpërndarë në rrjetet sociale ku akuzohet se ndodhet në Zvicër duke shpenzuar “paratë e qytetarëve” një kohë kur në Shqipëri po zhvillohen protesta për projektin në Zvërnec.
Në reagimin e tij, Rama i ka hedhur poshtë këto pretendime, duke i cilësuar të pavërteta dhe të nxjerra jashtë kontekstit. Ai sqaron se udhëtimi i tij në Zvicër nuk ka pasur asnjë lidhje me fonde publike, por ka qenë një ftesë private nga “Art Basel”, panairi i njohur ndërkombëtar i artit, ku janë prezantuar edhe punime të tij.
Kryeministri thekson se gjatë gjithë karrierës së tij në shërbimin publik nuk ka përdorur asnjëherë fonde shtetërore për udhëtime private, duke shtuar se e njëjta gjë vlen edhe për familjen e tij.
Në reagimin në platformën X, Rama kritikon ashpër përhapjen e informacionit të pavërtetë në rrjetet sociale, duke e cilësuar atë si pjesë të një fenomeni të gjerë të shpifjeve dhe dezinformimit online.
Reagimi i kryeministrit Rama
Qenka shpërndarë një video ku dikush më paska kapur mat duke pirë ujë në Basel të Zvicrës me shpenzimet e shtetit..
Në thuajse tre dekada shërbim publik unë kurrë nuk kam udhëtuar privatisht me lekët e shtetit dhe e njëjta gjë vlen edhe për familjen time.
Në 13 vjet në detyrën e kryeministrit unë dhe familja ime kurrë nuk kemi shkuar me pushime jashtë shtetit.
Në Zvicër isha i ftuar privatisht nga ArtBasel, panairi i përvitshëm i galerive më prestigjoze të artit në botë, ku janë prezantuar edhe vepra të miat. Kemi udhëtuar dhe qëndruar një ditë e gjysëm me bashkëshorten, si gjithnjë në këto raste plotësisht me shpenzimet tona.
Por ky është një rast i mirë në kohën e duhur, për të vënë një pikë të qartë mbi “i”:
Rreth njëzetë vite më parë, kur nuk më ishte regjur ende lëkura me baltën e shpifjeve e të akuzave pa hesap, pata vënë kujën publikisht duke thënë që “s’ka bir nëne a bir k…, që të gjejë në xhepin tim një qindarkë që s’është fituar me punë të ndershme”!
Sot, dy dekada më vonë, nuk jam më natyrisht ai 40 vjeçari i pamësuar ende me qenërinë e arenës plot baltë të jetës politike, i cili humbte gjumin nga plagët përvëluese të shpifjeve dhe akuzave kriminale.
Por e them me krenari, se ajo fjali e lëshuar asokohe nga dhimbja e nga ndjenja e turpit përpara njerëzve të mi dhe të gjithë atyre që më kishin besuar drejtimin e Tiranës, qëndron 100% e paprekshme në përmbajtjen e saj edhe sot, përballë të gjithë atyre që më kanë besuar drejtimin e Shqipërisë.
Dhe mos e harroni asnjëherë:
Kush shpif apo akuzon pa prova kundër jush, ose e ka bërë vetë atë për të cilën ju akuzon ose do ta bënte po të ishte në vendin tuaj, prandaj edhe gjelozia apo urrejtja ose të dyja bashkë e bëjnë t’i besojë çdo maskarallëku që nxjerr nga goja.
Kur shoh se si bota ku jetojmë është bërë gjithnjë e më shumë falë rrjeteve sociale, lëndina ku ferrat e pafundme të rrenës shumohen me shpejtësinë e klikimit, ndërsa lulet e së vërtetës mbyten rëndom nga ferrat, më shkon gjithnjë mendja tek Librat e Shenjtë, ku shpifësi shfaqet edhe më i keq se vrasësi.
