Kryeministri Edi Rama ka marrë pjesë në samitin Shqipëri–Izrael, një forum që mbledh rreth 40 kompani izraelite të inovacionit me synim forcimin e bashkëpunimit në fushën e sigurisë kibernetike dhe zhvillimit ekonomik.
Kryeministri vlerësoi bashkëpunimin me Izraelin, duke theksuar se përpjekja për të ndërtuar një partneritet të ngushtë me ekspertë dhe kompani izraelite nuk është e lehtë, por është thelbësore për zhvillimin e Shqipërisë.
Rama vuri në dukje lidhjen e fortë historike mes dy vendeve. Gjatë Luftës së Dytë Botërore, vendi ynë u bë strehë për hebrenjtë dhe, sipas tij, doli nga lufta me më shumë hebrenj sesa para saj.
Rama: Sa më shumë që e njoh Izraelin, e kuptoj që të bësh bashkë kaq shumë izraelitë nuk është e lehtë, edhe pse miti thotë që ju jeni gjithmonë të bashkuar. Faleminderit që keni ardhur dhe keni sjellë dijen tuaj për të na ndihmuar të ecim përpara në një rrugë që e kemi çelur, duke i besuar teknologjisë së re, digjitalizimit të insfrastrukturës sonë. Përmes teknologjisë vende si tonat mund të bëjnë një kërcim përpara dhe mund të bëjnë gjëra që ndonjëherë vendet e mëdha, shumë më të zhvilluara, e kanë më të vështirë t’i bëjnë. Ne besojmë fort te kjo marrëdhënie dhe kemi aryse për këtë, jo vetëm për shkak të historisë sonë që është një histori e krijuar në kohët më të errëta për popullin hebre, kur Shqipëria doli nga Lufta e dyrë Botërore si i vetmi vend në Evropë që numëronte më shumë hebre se sa përpara se të niste lufta. Kjo falë myslimanëve të Shqipërisë të cilët morën çdo hebre dhe vunë jetët në rrezik për të mbrojtur hebrenjtë. Kjo është një histori që ne e shtrëngojmë fort.
Ai u ndal te sulmet kibernetike të Iranit ndaj vendit tonë dhe tha se Shqipëria e ka mësuar sigurinë kibernetike “në mënyrën më të vështirë”, pas sulmeve të drejtuara ndaj sistemeve të saj digjitale.
Shefi i qeverisë tha se vendimi për të strehuar anëtarë të opozitës iraniane u mor mbi baza humanitare, duke theksuar se ata u pritën në Shqipëri për të mbrojtur jetën e tyre dhe jo për arsye politike apo për të përdorur territorin shqiptar si platformë veprimi.
Megjithatë Shqipëria arriti t’i përballojë këto sfida me ndihmën e partnerëve ndërkombëtarë, përfshirë Izraelin.
Rama: E mësuam sigurinë kibernetike në mënyrën më të vështirë. Si rezultat i mikpritjes sonë.. ne u hapëm derën iranianëve të cilët janë në opozitë dhe nuk e bëmë për shkak të ndonjë motivi politik, nuk e bëmë që t’i jepnim ndonjë platformë në Shqipëri që të luftonin regjimin nga Shqipëria. E bëmë sepse jetët e tyre ishin në rrezik dhe askush nuk donte t’i shpëtonte. Ne i hapëm dyert, i dhamë strehë dhe bëmë një marrëveshje. Ata mund të jetojnë në Shqipëri, të rrisin fëmijët e tyre këtu jashtë çdo rreziku, për sa kohë është e nevojshme. Regjimi iranian nuk e duronte dot këtë dhe na sulmoi, sulmoi atë që kishim punuar për vite të tëra, për të transformuar sistemet tona. Tani jemi një vend që ofron 95% të shërbimeve online. Këtë synuan ata, të na çonin mbrapsht në kohën e errët të shërbimeve publike në nivelin më të ulët. Ne ishim shumë të kënaqur në atë moment kur Izraeli na ofroi ndihmë, falë kësaj ndihme dhe ndihmës edhe të miqve tanë shumë të dashur nga Emiratet, i mbijetuam këtij sulmi. Mësuam se na duhet të investojmë dhe të ndërtojmë një sistem mbrojtjeje dhe nuk është e lehtë sepse sistemi ynë mbrojtës duhet të përballonte sulmet e një armiku jo të lehtë. Sot falë bashkëpunimit me Izraelin kemi një nivel krejt të ndryshëm të mbrojtjes kibernetike.
