Një ngjarje e rëndë kriminale është shënuar ditën e sotme në Balldren të Lezhës, ku një çift bashkëshortësh kanë mbetur viktima të një atentati me armë zjarri.
Sipas informacioneve paraprake, persona ende të paidentifikuar kanë qëlluar me breshëri plumbash në drejtim të një automjeti tip “Audi Q7”, ku udhëtonin viktimat. Si pasojë e të shtënave, kanë humbur jetën në vend Kreshnik Mujeci dhe bashkëshortja e tij.
Trupat e viktimave janë ende brenda automjetit, ndërsa policia ka mbërritur në vendngjarje dhe po punon për zbardhjen e plotë të rrethanave.
Nga të dhënat rezulton se Kreshnik Mujeci ka qenë një emër i njohur për policinë. Në vitin 2017, ai ishte arrestuar së bashku me vëllain e tij, Lin Mujeci, pasi dyshoheshin si autorë të vrasjes së shtetasit Genc Mhillaj, ngjarje e ndodhur në vitin 2016.
Aktualisht, grupi hetimor po vijon punën për identifikimin dhe kapjen e autorëve, si dhe për zbardhjen e motiveve të kësaj ngjarjeje të rëndë.
