Një aksident i rëndë ka ndodhur pasditen e kësaj të premteje në Fushë Krujë në afërsi të fshatit Gramëz, ku ka humbur jetën një 65-vjeçare dhe dy të tjerë kanë mbetur të plagosur.
Policia ka dhënë detaje mbi aksidentin, ku bën me dije se automjet Benz, i drejtuar nga Radvan Maja 22-vjeç u përplas me një Passat që drejtohej nga Ndrec Ruçi 73 vjeç nga Mirdita.
Fatkeqësisht, pasagjerja e mjetit Passat, e identifikuar si Tereza Laska ka humbur jetën, ndërsa drejtuesi i automjetit ka mbetur i plagosur.
Gjithashtu, nga aksidenti është lënduar edhe një grua, e cila ndodhej në ambientin e biznesit të saj pranë vendngjarjes. Ajo është goditur nga pjesë të shkëputura të automjetit “Passat” dhe është dërguar për mjekim.
Njoftimi:
Rreth orës 17:10, në kryqëzimin e fshatit Gramëz, Fushë-Krujë, automjeti me drejtues shtetasin N. R., rreth 73 vjeç, është përplasur me automjetin me drejtues R. M., rreth 22 vjeç.
Nga aksidenti ka humbur jetën shtetasja T. L., 65 vjeçe (pasagjere në automjetin me drejtues shtetasin N. R) si dhe janë dëmtuar të dy drejtuesit e automjeteve dhe një këmbësore shtetasja A. S., rreth 40 vjeçe, të cilët ndodhen në spital, nën kujdesin e mjekëve, jashtë rrezikut për jetën.
Grupi hetimor ndodhet në vendngjarje dhe po punon për zbardhjen e rrethanave të aksidentit.
