India ka konfirmuar se dy anije me flamur indian, që transportonin naftë bruto, janë sulmuar këtë të shtunë teksa po kalonin në Ngushticën e Hormuzit.
Në një deklaratë zyrtare, Ministria e Jashtme indiane bëri të ditur se incidenti ka ndodhur gjatë lundrimit të anijeve në një nga rrugët më të rëndësishme detare për transportin e energjisë.
Pas ngjarjes, ambasadori i Iranit në Nju Delhi, Mohammad Fathali, është thirrur në një takim nga zëvendësministri i Jashtëm i Indisë, Vikram Misri. Gjatë takimit, pala indiane shprehu shqetësimin e thellë për të shtënat ndaj dy anijeve dhe kërkoi sqarime nga autoritetet iraniane.
Zyrtari indian i kërkoi ambasadorit që t’i përcjellë qëndrimin e Indisë Teheranit dhe theksoi nevojën për rifillimin sa më të shpejtë të lëvizjes së sigurt të anijeve drejt Indisë përmes Ngushticës së Hormuzit.
