Kryedemokrati Sali Berisha, gjatë fjalës së tij në protestën para Kryeministrisë, theksoi se në 13 vitet e fundit Shqipëria është keqqeverisur.
Ai tha se sot ka dokumente që faktojnë se zgjedhjet e 11 majit ishin një farsë. Ndërsa shtoi se Bashkimi Europian ka paralajmëruar për zhbërjen e udhëtimit 32-vjeçar të Shqipërisë drejt rrugës europiane.
“Sot Shqipëria po përballet me pasoja akoma më katastrofike. Prej 13 viteve të fundit, pasojat kanë gërryer dhe rrënuar çdo ditë vetë ekzistencën e shqiptarëve si banorë të saj. Me pasoja që sot, nga Brukseli, BE-ja, për shkak të vjedhjes së papërmbajtur nga Ramaduro, dërgon paralajmërimin më ogurzi për Shqipërinë: paralajmërimin për zhbërjen nga e para të udhëtimit tonë 32-vjeçar, plot sakrifica dhe ëndrra. E kemi quajtur ‘Rilindjen’ qeveri të paligjshme, sepse e tillë është. Kemi dokumente që vërtetojnë farsën zgjedhore të 11 majit. Kemi shtatë rezoluta ku partitë kryesore në botë pajtohen me këtë fakt. Jemi treguar të butë, pasi po të marrësh vetëm ngjarjet e ditëve të fundit, arma është armiku më i rrezikshëm, që tejkalon edhe kërcënimet staliniste të Enver Hoxhës”, u shpreh Berisha.
