Analisti Plator Nesturi, duke folur në studion e “Quo Vadis” të moderatores Pranvera Borakaj në Vizion Plus, analizoi aksionin politik të opozitës.
Nesturi tha se është për të ardhur keq kur sheh gjendjen e opozitës. Sipas tij, opozita e Sali Berishës nuk frymëzon dhe qytetarët e kanë ndëshkuar me 1 milion vota.
Ai tha se Sali Berisha e gjakosi dy herë Shqipërinë dhe nuk mund të votohet më nga shqiptarët.
Pjesë nga biseda:
Nesturi: Ne kemi një situatë që është rënduar dhe mund të rëndohet edhe më shumë. Sot njerëzit nuk thonë më vetëm kush do të shkojë në SPAK, kush do të shkojë në burg; ky është proces që do të vazhdojë. SPAK-u duhet vlerësuar që po hyn në plagët më të thella të qeverisjes dhe të shoqërisë. Kemi të bëjmë me një mënyrë shkeljeje që po lë pasoja. Qytetarët nuk është se nuk e kanë ditur këtë gjë.
Borakaj: Në këtë përmasë?
Nesturi: Kjo është çështje tjetër. Por në këtë kuadër qytetarët janë sy e veshë se si do të zgjidhet. Ne jemi në një krizë, ku duhet parë se kush janë aktorët që mund të kontribuojnë në këtë gjë. Nuk është se po merrem me opozitën, pasi unë dhe qytetarët e kemi vënë notën dhe e shikojmë si opozitë që nuk është e besueshme. Mos harroni që Berishës i është dhënë shansi i dytë në 2005-ën, pasi Shqipëria doli e gjakosur në ’97-ën. Mos harroni që në 2013-ën ndodhi 21 Janari.
Ibraj: Edhe Gërdeci.
Nesturi: Po, pa harruar edhe Gërdecin. Besoni ju që qytetarët besojnë te një opozitë e cila është kthyer në një kalbësirë dhe që nuk po ngre dot vetveten?
Borakaj: Mendon se duhet të kishte reagim tjetër ndaj këtyre skandaleve?
Nesturi: Qeveria ka problematikën e vet, unë nuk është se po e mbroj. Kam shprehur rezerva, sepse është një fenomen që është bërë gangrenë dhe kërkon ndërhyrje të thellë. Çështja është se kush janë aktorët: PS, PD, PL, aq sa mund të bëjnë. Në të gjithë këtë fashë të spektrit politik, ajo që kërkohet është pikërisht heqja e një establishmenti të vjetër politik. Kjo s’ka të bëjë vetëm me qeverisjen, por kap një rreze të gjerë. Kjo është kriza politike.
Qiraxhi: Emri “krizë” është panik i ekzagjeruar.
Nesturi: Unë nuk e di si e shikon krizën ti.
Borakaj: Duket sikur funksionon shteti në këtë moment.
Qiraxhi: Në gjithë këtë skandal nuk ka prodhuar krizë.
Nesturi: Gjithkush në këtë klasë politike duhet të nxjerrë konkluzionet se si të adaptohet në këtë realitet të ri. Nëse vijojmë me akuza vetëm ndaj kundërshtarit, nuk po sjellim ndonjë gjë të re. I gjithë thelbi është kush do të marrë përsipër zgjidhjen e problemit.
