100 vjet pas lindjes, 41 vepra origjinale të Maestro Ibrahim Kodra bëjnë bashkë zviceranë, italianë, shqiptarë, etj në një ekspozitë në Lugano.
Ekspozita ofroi një shijim të krijimeve që datojnë nga 1944 e largët kur Kodra me bursë të qeverisë shqiptare dhe italiane mbaroi Akademinë e Brerës, njerën nga shkollat më të mira të pikturës në Europë, deri në ditët e fundit të jetës së tij.
Mes veprave të përfshira në këtë përzgjedhje të bukur përfshihej « Shqipëria fantastike, », « ëndrra e një gjenerali », « nderim për Armstrongun », etj, vepra që të lejojnë të kuptosh kursin e transformimit artistik të Kodrës që foli gjuhën e artit nëpërmjet shenjave.
Zonja Pacolli foli për përpjekjet e fondacionit me emrin e Mjeshtrit Kodra në përjetësimin e vullnetit të tij për të përhapur vlerat e artit në përgjithësi dhe pikturës në veçanti tek të rinjtë dhe fëmijët.
Fondacioni Ibrahim Kodra, fëmijët e botës drejtuar nga bashkëshortja e ministrit të jashtëm dhe zëvendëskryeministrit Behgjet Pacolli synon që të hapë në disa qendra të botës shqiptare, muzeun Ibrahim Kodra, kurse arti të lidhura me emrin e tij, për fëmijët dhe brezin e ri, si njëlloj amaneti i mjeshtrit të madh shqiptar, që ka lënë gjurmë të pashlyeshme në historinë e pikturës italiane, por dhe europiane.
