Subscribe

Prokuroria e Sarandës ka reaguar lidhur me ecurinë e hetimeve për gjetjen e dy shokëve të zhdukur, Leonard Theodhorit dhe Fatmir Sulovarit.

 

Në një deklaratë zyrtare, Prokuroria shprehet se po kryen hetime me intensitet të lartë. Nga ana tjetër, Prokuroria e Sarandës kërkon nga mediat që të mos publikojnë lajme të paverifikuara nga ky institucion, me argumentin se po dëmtojnë procesin hetimor.

 

“Prokuroria pranë Gjykatës së Parë me Juridiksion të Përgjithshëm Sarandë, në bashkëpunim me policinë gjyqësore të Kom.Pol.Sarandë dhe Drejtorisë Vendore të Policisë Vlorë po kryen me intensitet të lartë veprimet proçeduriale në funksion të procedimit penal nr 169/2023, regjistruar për veprën penale “Rrëmbimi ose mbajtja peng e personit” parashikuar nga neni 109/3 i Kodit Penal.

 

Duke vlerësuar se parësore në ushtrimin e funksioneve të saj kushtetuese, është ushtrimi i ndjekjes penale dhe zbulimi i autorëve të veprës penale, Prokuroria Sarandë konstaton me shqetësim se informacionet e fundit mediatike të datës 01 maj 2023, nuk i shërbejnë zbulimit të së vërtetës, madje as edhe nuk i ndihmojnë organet ligjzbatuese për zbardhjen sa më shpejt të saj.

 

Gjithashtu, organi i akuzës vlerëson se nuk është as edhe në interesin publik, publikimi i informacioneve të pa verifikuara dhe që nuk janë shpërndarë ligjërisht nga autoritetet kompetente.

 

Vlerësojmë se ekspozimi në media apo rrjetet sociale i deduksioneve personale nga cilido që mund të vijë në posedim të informacioneve të ndryshme të marra konfindecialisht nga persona  që e përfitojnë informacionin për shkak të detyrës, jo vetëm që cënon rëndë veprimtarinë hetimore por i vendos edhe personat e ndryshëm të përfshirë ose jo në ngjarjen konkrete në situata jo reale dhe të panevojshme në raport me interesin e familjarëve të viktimave nga vepra penale, në raport me interesin publik por edhe në raport me vetë autoritetet hetimore”, shprehet Prokuroria.

 

Ndërkohë, familjarë të dy shokëve të zhdukur, Leonard Theodhorit dhe Fatmir Sulovarit, zhvilluan këtë të martë një protestë përpara Drejtorisë së Përgjithshme të Policisë së Shtetit. Ata kërkojnë përgjigje mbi fatin e dy të zhdukurve, ndërsa akuzojnë organet kompetente se kanë neglizhuar çështjen.

Leave a Reply

Your email address will not be published. Required fields are marked *