Autoritetet policore në Kosovë kanë dhënë detaje të tjera lidhur me arrestimin e Naim Murselit, Granit Plavës dhe Kushtrim Kokallës si të dyshuar për vrasjen e Liridona Ademajt mbrëmjen e 29 nëntorit.
Hetuesit kanë sekuestruar një pistoletë, 19 fishekë dhe një automjet që u përdorën për krimin e rëndë.
Detajet tronditëse që u zbuluan një ditë më parë i dhanë një tjetër kthesë ngjarjes që fillimisht u raportua si grabitje me pasojë vdekjen.
Vetëm disa orë pas ceremonisë mortore të 33-vjeçares policia arrestoi burrin e saj Naim Murseli, i cili akuzohet se porositi vrasjen dhe tentoi ta fshehë atë si grabitje. Po ashtu u vu në pranga bashkëfshatarin e tij Granit Plava, i cili dyshohet se kreu krimin.
Ishte pikërisht ky i fundit, që u zbërthye nga policia duke treguar se Naim Murseli i kishte kërkuar vrasjen e gruas në këmbim të 30 mijë eurove. Gjysma e pagesës ishte bërë përpara ngjarjes dhe gjysma tjetër do të jepej më pas.
Gjatë orëve të mbrëmjes së te premtes policia e Kosovës vuri në pranga një person të tretë, Kushtrim Kokalla, i cili rezulton të jetë anëtar i FSK, por edhe kushëri i Naim Murselit. Nuk dihet ende cili ka qenë roli i tij në ngjarje.
I paqartë mbetet edhe motivi që e çoi Naim Murselin, ish-këshilltar i ish-presidentit Behxhet Pacolli, në vrasjen e nënës së dy fëmijëve të mitur.
Ngjarja e rëndë ndodhi mbrëmjen e së mërkurës, dhe u raportua fillimisht nga Naim Murseli si grabitje me armë, por rrethanat e dyshimta ngritën pikëpyetje të mëdha edhe tek ekspertët e fushës.
Në deklaratën e parë në polici Naim Murseli tha se gjatë grabitjes ai mundi të dalë nga automjeti bashkë me fëmijët, ndërsa mbeti në makinë Liridona Murseli e cila u qëllua për vdekje./vizionplus.tv
