Është mbyllur protesta e opozitës, e cila nisi për të kërkuar largimin e kryeministrit Edi Rama dhe krijimin e një qeverie teknike që do të çojë vendin drejt zgjedhjeve parlamentare.
Protesta e Partisë Demokratike zgjati 3 orë, nga ora 17:00 deri më 20:00.
Lexo edhe :
Related Posts
Kaos, trafik dhe tensione mbizotëruan në mosbindje civile të opozitës, e cila bllokoi pesë kryqëzime në kryeqytet pasditen e të martës.
Protesta u mbajt tek Bashkia, rreth rrotullimi Zogu i Zi, Rruga e Elbasanit, Sheshi Wilson dhe te Pallati me Shigjeta.
Protesta në të gjitha pikat u shoqërua me konfrontime fizike mes policisë, protestuesve dhe deputeteve demokratë.
Përplasja në rrugën e Elbasanit
Deputeti Flamur Noka është konfrontuar me policinë për bllokimin e qarkullimit, pasi oficerët njoftuan megafon largimin dhe mos bllokimin e rrugëve nga ana e qytetarëve. Policia njoftoi se ndalimi i qarkullimit penal është vepër penale dhe dënohet nga ligji.“Policia do zbatojë ligjin. Qytetarë, ju lutem largohu nga rruga. Po bllokoni qarkullimin e mjeteve dhe qytetarëve. Ndalimi dhe bllokimi i rrugëve përbën vepër penale dhe dënohet nga ligji. Policia do zbatojë ligjin”, tha policia. Një qytetarë humbi ndjenjat dhe u transportua me urgjencë në spital.
Protesta pranë Bashkisë
Qytetarët dhe përfaqësuesit e PD-së protestuan edhe pranë Bashkisë, ku po ashtu edhe në këtë zonë pati tensione. Policia përdori autobote me ujë dhe spraj për shpërndarjen e turmës para Bashkisë.
Sheshi Wilson
Tensionet nuk munguan as tek sheshi Wilson, pasi pati përplasje edhe mes udhëheqësve të PD dhe policisë. Në rresht të parë ka qenë nënkryetari i PD Gazment Bardhi dhe Sekretari i Përgjithshëm i Partisë së Lirisë, Tedi Blushi. Sekretari i PL-së Tedi Blushi dhe Luan Baçi hipën sipër autobotit me ujë. Ndërkohë, gjatë ndërhyrjes së autobotit të ujit, deputeti Bledion Nallbati ka tentuar të ndalë me trup mjetin. Është dashur ndërhyrja e policisë që deputeti Nallbanti dhe protestuesit të lirojnë rrugën. Në një moment Nallbati ka fyer dhe kërcënuar një punonjës policie i cili ka hedhur spraj për ta larguar nga autoboti. “Mbaje mend, do takohemi mbrapa”, i drejtohet Nallbati punonjësit të policisë ndërsa përdor edhe fjalë fyese.
Bllokimi i rrugës tek “Pallati me shigjeta”
Pika e pestë e bllokimit të rrugëve ishte pranë pallatit me Shigjeta. Edhe në këtë zonë pati përplasje mes protestuesve dhe policisë.
Rrethrrotullimi Zogu i Zi
Pikërisht në Zog të Zi, aty ku ndodhej deputeti Oerd Bylykbashi,dy protestues janë shoqëruar në Polici. Kjo solli përplasje verbale mes policinë dhe deputetit.
Ndërkohë më herët, Policia e Shtetit i ka kujtuar Partisë Demokratike se bllokimi i rrugëve është vepër penale dhe se do të mbajnë përgjegjësi administrative dhe penale.
Tek sheshi para bashkisë ishte Edi Paloka, kryetari i këshillit kombëtar, tek rruga e Elbasanit sekretari i përgjithshëm Flamur Noka, nënkryetarët e partisë; Gazment Bardhi, Agron Gjekmarkaj e Oerd Bylykbashi bllokuan respektivisht, Sheshin Willson, kryqëzimin tek Pallati me Shigjeta dhe zonën e Zogut të Zi.
Kujtojmë se në 29 tetor opozita organizoi një protestë të ngjashme duke bllokuar 6 akset kryesore në të gjithë Shqipërinë. /vizionplus.tv
