Skënder Gega pritet të jetë trajner i ri i Skënderbeut.
Lajmi bëhet me dije nga burime brenda klubit korçar kur thanë se pas një bisede që presidenti Ardjan Takaj, ka pasur me trajnerin e njohur, kanë rënë dakord që Gega të jetë në krye të ekipit nga ndeshja e radhës në transfertë me Laçin. Burimet nuk bëjnë me dije nëse Gega do të jetë në krye të stolit korçar deri në fund të sezonit apo do të vazhdojë edhe për një tjetër sezon.
Por ajo që mësohet është se pas Memellit, trajneri kampion me Partizanin para dy sezonesh, ulet në pankinën bardhekuqe. Prej mëngjesit të sotëm, Migen Memelli, i ka kërkuar dorëheqjen presidentit Takaj, dorëheqje që ky i fundit e ka pranuar. Skënderbeu prej 12 javësh nuk ka fituar asnjë takim në kategorinë Superiore, duke e zbritur ekipin në vendin e fundit të klasifikimit me 17 pikë.
Gega do të jetë njeriu që në javët e mbetura do të kërkojë të bëjë mrekullinë për të shpëtuar një sezon tejet të vështirë për korçarët.
