Rrjeti radioteleviziv publik britanik, BBC ka reaguar zyrtarisht duke dalë në një qëndrim përfundimtar pas skandalit të një prezantuesi mashkull, i cili shfaqet i zhveshur, në video-telefonat me një të mitur.
BBC shprehet se merr seriozisht akuzat e ngritura dhe po punon për verifikimin e pretendimeve të ngritura nga nëna e të miturit.
“BBC i merr seriozisht çdo akuzë dhe ne kemi procese të forta të brendshme për t’u marrë në mënyrë proaktive me akuza të tilla. Ky është një grup rrethanash komplekse dhe me lëvizje të shpejtë dhe BBC po punon sa më shpejt që të jetë e mundur për të vërtetuar faktet në mënyrë që të informojë siç duhet hapat e ardhshëm të duhur. Është e rëndësishme që këto çështje të trajtohen në mënyrë të drejtë dhe me kujdes. Ne kemi qenë të qartë se nëse – në çdo moment – del në dritë ose na jepet informacion i ri, kjo do të veprohet në mënyrë të duhur dhe do të ndiqet në mënyrë aktive”, thuhet në reagim.
Rrjeti radioteleviziv britanik bën me dije se ka pezulluar prezantuesin, si dhe po punon për të pasur informacion të plotë mbi skandalin e pretenduar.
“BBC fillimisht u bë në dijeni për një ankesë në maj. Akuza të reja na u bënë të enjten të një natyre tjetër dhe përveç pyetjeve tona, ne kemi qenë në kontakt edhe me autoritetet e jashtme, në përputhje me protokollet tona. Ne gjithashtu mund të konfirmojmë se një anëtar mashkull i stafit është suspenduar. Ne presim që të jemi në gjendje të ofrojmë një përditësim të mëtejshëm në ditët në vijim ndërsa procesi vazhdon. Bordi i BBC do të vazhdojë të jetë i përditësuar.”
Prezantuesi i njohur i lajmeve dyshohet se paguante shuma parash në mënyrë që të miturit të realizonin video-telefonatë me të, duke kryer akte erotike.
Ishte nëna e një fëmijë që i dha zë rastit, duke pretenduar se ai kishte paguar fëmijën e saj 35 mijë paund dhe për më tepër këto para, fëmija i shpenzonte për të blerë kokainë.
Kur nisi historia që denoncon nëna, fëmija ishte 17 vjeç ndërsa kanë kaluar tre vite, por kjo po vazhdonte ndaj ajo denoncoi në gazetën The Sun, duke deklaruar se nuk donte asnjë pagesë, por vetëm që BBC ta largonte atë nga ekrani.
