Të paktën 18 persona kanë humbur jetën dhe 48 të tjerë janë plagosur si pasojë e një shpërthimi të fuqishëm që ka ndpdhur mëngjesin e kësaj të premtje në një treg në Pakistanin jugperëndimor.
Mediat ndërkombëtare bëjnë me dije se sipas zyrtarëve të policisë bomba ishte vendosur në një dyqan në zonën e dominuar nga myslimanët shiit në Quetta, kryeqytet i krahinës së Baluchistanit dhe në mesin e viktimave ka pjesëtarë të një pakice kombëtare.
Razzaq Cheema, zëvendës i inspektorit të përgjithshëm të policisë, tha se kanë filluar hetimet për të ndriçuar motivet e sulmit. Askush nuk e mori ende përgjegjësinë për sulmin në zonën e tregut Hazarganji, i cili është përballur me sulme edhe në të kaluarën.
Kryeministri i Pakistanit, Imran Khan, e dënoi sulmin e së premtes. Militantët separatiste të Baluchistanit dhe ekstremistët besnikë të talebanëve dhe të Shtetit Islamik, janë aktiv në Baluchistan. Ata rëndom marrin përsipër përgjegjësinë për sulme mbi forcat e sigurisë dhe civilët, përfshirë edhe komunitetin hazara.
