Policia e Shtetit ka shoqëruar 41 shtetas gjatë 24 orëve të fundit në ambientet e komisariateve, pasi nuk respektuan oraret kufizuese dhe nuk iu bindën urdhrit për t’u futur në banesa.
Në të gjithë vendin janë ndëshkuar 154 shtetas më gjobë 100 mijë lekë, të cilët u konstatuan nga shërbimet e policisë duke lëvizur në këmbë apo me biçikleta, pa ndonjë arsye apo emergjencë.
Shërbimet e Policisë në Tiranë kanë arrestuar në flagrancë 2 shtetas, konkretisht shtetasin A. R., 42 vjeç, pasi ka kundërshtuar me dhunë punonjësit e policisë për moszbatimin e urdhrit për të qëndruar në banesë, si dhe shtetasin D. T., 26 vjeç, pasi ka shkelur urdhrin për të qëndruar në banesë. Po ashtu gjatë kontrollit fizik iu gjetën 8 gr. lëndë narkotike.
Në 24 orët e fundit në të gjithë vendit janë evidentuar 129 drejtues mjetesh që kanë shkelur urdhrin e ndalim qarkullimit, të cilët janë ndëshkuar me heqje të lejes së drejtimit dhe bllokim mjeti.
Ndërkohë, janë konstatuar 17 subjekte tregtie që nuk kanë respektuar orarin për mbylljen në orën 13:00. Gjithashtu, në Shkodërështë ndëshkuar me gjobë 700.000 lekë, shtetas E. Ç., i cili ka thyer rregullin e vetëkarantinimit.
