Fabjan Pepaj jeton prej vitesh në Londër. Ai ishte pjesë e Samitit të Diasporës që u zhvillua këtë javë në Tiranë.
Ky event sipas tij ishte një ogur i mirë për të bërë bashkë emigrantët nga e gjithë bota, që kanë dëshirë të njihen me rregullat dhe potencialin që ofron Shqipëria për të investuar.
Gjatë një interviste në emisionin E-ZONE, ai evidentoi disa pengesa që sipas tij nuk i pranon asnjë investitorë
“Çdo investitor kërkon rregulla të qarta loje, kërkon transparencë, kërkon një treg të hapur që kushdo mund të hyjë dhe të konkurrojë. Kërkon më pak burokraci. Por në Shqipëri këto problematika janë të theksuara. Nëse do ta krahasojë me kohën e komunizmit, mund të them se në atë kishim një ekonomi të programuar, ndërsa sot në Shqipëri kemi tregje oligopolistike, pra të përqëndruar në pak duar, që nuk të ofrojnë lirinë për të hyrë në treg dhe për të konkurruar, pra njësoj si në komunizëm, është i njëjti koncept”, tha Pepaj
Sipas tij, qeveria shqiptare duhet të bëjë më shumë për të tërhequr kapitalin e diasporës. Janë të shumtë ata emigrant që duan të investojë, por nuk ka politika të dedikuara për diasporën.
Sipas të dhënave nga INSTAT rezultojnë se janë mbi 2.2 milion shqiptarë që jetojnë në botë prej vitesh. Numri më i madh numërohet në Itali, Greqi dhe SHBA.
