Një operacion i koduar “Illegality” është finalizuar nga Policia e Durrësit, në kuadër të luftës kundër kontrabandës së mallrave.
Gjatë kontrolleve në një dyqan në lagjen nr. 14, Durrës, në pronësi të një 46 vjeçari, policia ka zbuluar mallra të ndryshme të dyshuara të kontrabanduara.
Në ambientet e biznesit janë gjetur qindra paketa me cigare dhe fishekzjarrë, të cilat dyshohet se tregtoheshin pa përmbushur detyrimet doganore dhe fiskale.
Sipas policisë, 46-vjeçari dyshohet gjithashtu se fshihte të ardhurat e përfituara nga shitja e këtyre mallrave. Në përfundim të operacionit, pronari i dyqanit u arrestua.
Ai akuzohet për veprat penale “Kontrabanda me mallra me të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Tregtimi dhe transportimi i mallrave kontrabandë”, “Ruajtja ose depozitimi i mallrave kontrabandë”, “Fshehja e të ardhurave” dhe “Mospagimi i taksave dhe tatimeve”.
“Në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, specialistët e Seksionit për Hetimin e Krimeve Ekonomiko-Financiare të DVP Durrës, bazuar në informacionet e siguruara nëpërmjet inteligjencës informative, finalizuan operacionin e koduar “Illegality”.
Gjatë operacionit u ushtrua kontroll në dyqanin e shtetasit R. D., në lagjen nr.14, Durrës, ku nga kontrollet dhe verifikimet rezultoi se shiteshin fishekzjarrë dhe cigare të llojeve të ndryshme, të dyshuara të kontrabanduara, si dhe fshiheshin të ardhurat e përfituara nga shitja e tyre.
Në vijim të veprimeve, u arrestua në flagrancë pronari i dyqanit, shtetasi R. D., 46 vjeç, banues në Tiranë, për veprat penale “Kontrabanda me mallra me të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, “Tregtimi dhe transportimi i mallrave kontrabandë”, “Ruajtja ose depozitimi i mallrave kontrabandë”, “Fshehja e të ardhurave” dhe “Mospagimi i taksave dhe tatimeve”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”, njofton policia.
/vizionplus.tv
