Departamenti Amerikan i Shtetit ka konfirmuar se vendet e të Ballkanit janë përfshirë në kontratat që bëjnë pjesë në një strategji më të gjerë amerikane për dëbimin e shtetasve të huaj të cilët nuk kanë status të rregulluar.
Në një përgjigje për Radio Evropa e Lirë DASH ka deklaruar se nuk komenton detajet e komunikimeve diplomatike, por ka theksuar se zbatimi i politikës së migracionit të administratës Trump mbetet një nga prioritetet kryesore të saj.
“Partnerët amerikanë dhe udhëheqësit rajonalë po punojnë ngushtë me ne për t’i dhënë fund krizës së emigrimit të paligjshëm dhe masiv. Largimi nga SHBA-ja i të huajve, për të cilët ekzistojnë urdhra përfundimtarë për dëbim, si dhe dëbimi i emigrantëve të paligjshëm, i mbron Shtetet e Bashkuara nga terroristët e huaj dhe kërcënimet e tjera ndaj sigurisë kombëtare dhe rendit publik”.
DASH thekson gjithashtu, se bashkëpunimi i vazhdueshëm me qeveritë e huaja është kyç për parandalimin e emigrimit të paligjshëm dhe masiv, si dhe për sigurinë kufitare.
Siç ka thënë sekretari i Shtetit, Marco Rubio, ne mbetemi të vendosur në përpjekjet tona për t’i dhënë fund emigrimit të paligjshëm dhe masiv dhe për të forcuar sigurinë e kufijve amerikanë. Në këtë drejtim, çdo shtet duhet urgjentisht të pranojë kthimin e shtetasve të vet, që nuk kanë bazë ligjore për të qëndruar në Shtetet e Bashkuara”.
Të enjten agjencia e lajmeve “Bloomberg” raportoi se Shtetet e Bashkuara të Amerikës janë duke ushtruar presion mbi Serbinë dhe disa vende të tjera të rajonit të Ballkanit Perëndimor që të pranojnë emigrantë të deportuar nga territori i SHBA-së.
/vizionplus.tv
