Pas vendimit të liderëve të Bashkimit Evropian për të ndaluar 90 për qind të importeve të lëndëve djegëse nga Rusia, Shtetet e Bashkuara të Amerikës i japin “dritën jeshile” Venezuelës të rinisë eksportet e saj të naftës në Evropë.
Në një raport të publikuar nga mediat ndërkombëtare thuhet se Uashingtoni do të lejojë dy kompani evropiane të naftës, në Itali dhe Spanjë, të importojnë “arin e zi” nga Venezuela. Qëllimi i kësaj lëvizjeje është të mbulojë një pjesë të humbjeve që vijnë nga embargoja ndaj naftës ruse, ndërsa dërgesat e para priten të fillojnë në fillim të korrikut.
Edhe pse sasitë e naftës që do të lejohen të transportojnë dy kompanitë evropiane nuk janë shumë të mëdha, ky veprim është parë si një alternativë e mundshme.
Vendimi i Uashingtonit për të lejuar eksportet e naftës është përshëndetur edhe nga Presidenti i Venezuelës, Nicolas Maduro. “Shtetet e Bashkuara ndërmorën hapa të vegjël, por të rëndësishëm.” – u shpreh Maduro. Aktualisht rreth 70% e shitjeve të naftës të Venezuelës sot shkojnë në rafineritë e Kinës.
Shtëpia e Bardhë në vitin 2019, nën administrimin e ish-presidentit amerikan Donald Trump kishin vendosur sanksione ndëshkuese Venezuelës, me synimin për të rrëzuar presidentin Maduro nga pushteti.
Një zyrtar i lartë amerikan theksoi se politika e SHBA ndaj Venezuelës nuk kishte ndryshuar. Sanksionet do të lehtësohen, nëse bëhet përparim drejt demokracisë dhe mbahen zgjedhje të lira.
