Një ekzekutim me vdekje që ishte planifikuar të kryhej në shtetin amerikan të Tenesit u shty në momentet e fundit, pasi personeli mjekësor nuk arriti të gjente venë për injektimin e solucionit vdekjeprurës te i dënuari Toni Karuthers, 57 vjeç. Autoritetet njoftuan se procedura u anulua dhe guvernatori i shtetit, Bill Lee, i dha të dënuarit një shtyrje prej një viti.
Karuthers ndodhej në burgun e Nashvilit dhe ishte dënuar me vdekje për vrasjen e tre personave në vitin 1994. Sipas shërbimit të burgjeve të Tenesit, mjekët arritën të vendosnin linjën e parë të injektimit, por nuk mundën të gjenin një venë të dytë rezervë, siç kërkohet nga ligji. Për këtë arsye, ekzekutimi u ndërpre.
I dënuari, i cili ka kaluar më shumë se 30 vite në pritje të ekzekutimit, vazhdon të deklarojë pafajësinë e tij. Organizatat kundër dënimit me vdekje reaguan menjëherë pas ngjarjes, duke e cilësuar procedurën “të frikshme” dhe duke ngritur shqetësime për mënyrën se si kryhen ekzekutimet me injeksion vdekjeprurës në SHBA.
Ndërkohë, në shtetin e Floridës u realizua një tjetër ekzekutim sipas planit. 47-vjeçari Richard Knight u ekzekutua me injeksion vdekjeprurës pasi ishte dënuar për vrasjen e një gruaje dhe vajzës së saj 4-vjeçare në vitin 2000.
Me këtë rast, numri i ekzekutimeve në Shtetet e Bashkuara gjatë këtij viti ka arritur në 14. Sipas të dhënave zyrtare, shumica e tyre janë kryer me injeksion vdekjeprurës, ndërsa disa shtete kanë përdorur edhe metoda të tjera, si asfiksia me azot apo pushkatimi.
Dënimi me vdekje mbetet një nga çështjet më të debatueshme në SHBA. Aktualisht, 23 nga 50 shtetet amerikane e kanë hequr plotësisht këtë masë, ndërsa në disa të tjera zbatimi i saj është pezulluar përmes moratoriumeve të vendosura nga guvernatorët.
/vizionplus.tv
