Pas urdhërarresteve të lëshuara nga Prokuroria e Tiranës për zyrtarë të Microcredit Albania, të akuzuar se kishin krijuar një skemë piramidale mashtrimi me kreditë, Banka e Shqipërisë vendosi të revokojë licencën për këtë shoqëri.
E njëjta masë u mor edhe ndaj shoqërisë “Final”, që po ashtu ishte e licencuar për blerjen e kredive me probleme dhe për shlyerjen e tyre.
“Vendimarrja e Bankës së Shqipërisë bazohet në dispozitat ligjore dhe rregullative në fuqi që rregullojnë veprimtarinë e subjekteve financiare jobanka, të cilat parashikojnë, ndër të tjera, rastet e revokimeve të licencave kur subjektet e licencuara nuk vazhdojnë të plotësojnë më kushtet në bazë të të cilave janë licencuar”, tha Banka e Shqipërisë.
Shoqëritë Microcredit dhe Final kanë në regjistrat e tyre afro 32 mijë klientë, për të cilët pritet vendimi i Këshillit Mbikëqyrës të Bankës së Shqipërisë që detajon procedurën që duhet të ndiqet pas revokimit të licencave për dy subjektet.
Arben Malaj, ish-anëtar i Këshillit Mbikëqyrës në Bankën Qendrore shpjegoi për “Vizion Plus” se në një situatë të tillë mund të ndiqet e njëjta rregullore që zbatohet në rastet kur falimenton një bankë e nivelit të dytë dhe të gjitha kreditë dhe depozitat e saj i transferohen me vendim të Bankës së Shqipërisë një banke tjetër.
Malaj sqaroi se te kredimarrësit që kanë detyrime të pashlyera ndaj dy shoqërive Microcredit dhe Final nuk duhet të mendojnë se me revokimin e licencave, kreditë e tyre fshihen. Në çdo rast, këto kredi do të vijojnë të mblidhen, qoftë edhe përmes një administrator të përkohshëm të caktuar nga Banka e Shqipërisë, deri në një vendim final.
Guvernatori Gent Sejko raportoi pak ditë më parë në Komisionin e Ekonomisë se për blerjen e kredive të këqija janë licencuar në total 5 shoqëri, që kanë 63 mijë klientë në regjistra.
