Kaloi edhe një javë nga afati njëmujor shtesë që Kuvendi i akordoi komisionit të posaçëm të reformës zgjedhore, por sërish nuk u prodhua asnjë e re në përpjekjet për amendimin e ligjit zgjedhor, ndërsa nga data e zgjedhjeve na ndajnë vetëm tre muaj.
Reforma zgjedhore vazhdon të mbetet e bllokuar, ndërsa opozita vijon prej një muaji protestën e saj nën kauzën për krijimin e një qeverie teknike që do të garantonte zgjedhje të lira dhe të ndershme.
Fillimisht, një nga arësyet e protestës së Partisë Demokratike ishte kërkesa e saj për aplikimin e votimit elektronik në zgjedhje, por më pas kjo ia la vendin kërkesës për formimin e një qeverie me bazë të gjerë, si e vetmja garanci që zgjedhjet e ardhshme të jenë demokratike dhe të pakapura.
Megjithë apelin e vazhdueshëm të faktorit ndërkombëtar për nevojën e përmirësimit të legjislacionit zgjedhor, që do të përmirësonte dhe standardet e zgjedhjeve, ende nuk ka asnjë shenjë konsensusi për këtë reformë, e cila domosdoshmërisht kërkon edhe votën e opozitës.
Në mbledhjen e fundit të komisionit të posaçëm, e mbajtur më 13 janar, të dyja palët paraqitën propozimet se ku duhet ndërhyrë në Kodin Zgjedhor. Financimi i partive dhe fushatave; caktimi i vëzhguesve; trajnimi i komisionerëve, media, propaganda zgjedhore, ulja e pragut elektoral për partitë e koalicionit, sistemi i votimit dhe i numërimit; listat zgjedhore; votimi i emigrantëve, krimet elektorale, etj, jane disa nga 36 propozimet e prezantuara, të hartuara nga partitë politike dhe nga shoqëria civile.
Por, ndërsa në letër propozimet ka kohë që janë bërë të njohura, për miratimin e tyre nuk ka ende asgjë të re. Komisioni i reformës zgjedhore, i ngritur nga parlamenti në dhjetor 2015, me një mandat 6-mujor, i ka tejkaluar tashmë të gjitha afatet, duke e vënë në dyshim ndërhyrjen ne Kodin Zgjedhor, të rekomanduar nga ndërkombëtarët.
