Kryeministri Edi Rama e quajti armik të padukshmë koronavirusin. Gjatë mbledhjes së qeverisë, kreu i qeverisë tha se virusi nuk pyet për prejardhjen, por vetëm godet.
“Kjo është një luftë me një armik fare të padukshëm që hyn në trupin tonë dhe të njerëzve tanë më të dashur, duke kërcënuar seriozisht shëndetin dhe jetën e atyre që janë të sëmurë mes nesh. Kjo do të thotë që mund të jesh malësor, lab, mund të kesh shumë për tu krenuar me historitë e trimërisë në male apo bregdet, por në këtë rast ky armik nuk pyet as nga vjen, as kush je dhe as se çfarë historie ke dhe as ku je. Godet.”
Gjithashtu, Rama tha se shkollat u mbyllën jo për të qëndruar në kafe, por për t’u “izoluar” në shtëpi që të shmanget përhapja e koronavirusit.
“Thirrja për të kufizuar në maksimumin e mundshëm kontaktet fizike nuk është një predikim në ajër, por një thirrje që buron nga këshilla nr.1 e OBSH dhe të gjithë ekspertëve të fushës në mbarë globin. Vendosëm të mbyllim shkollat, çerdhet, universitetet. Jo për tu dhënë një dy javësh pushim për tu mbledhur nëpër disko, pube, argëtuar si të ishte një kohë e zakonshme, sepse kjo është një kohë lufte që bota do ta fitojë, ne do ta ftojmë, ne të gjithë duhet çmos që të kufizojmë maksimalisht dëmet që mund t’i shkaktohen shëndetit tanë dhe të njerëzve tanë.”
