Kryeministri Edi Rama ka konfirmuar nga salla e parlamentit se projekti i “Ballkanit të Hapur” do të vazhdojë pasi i shërben interesit të Shqipërisë.
Gjatë një interpelance me demokratin Tritan Shehu, shefi i qeverisë shpjegoi se “Ballkani i Hapur” është mekanizëm për zbatimin e procesit të Berlinit dhe ndihmon rrugën e Shqipërisë drejt BE; edhe pse për opozitën ky projekt është një prej dështimeve më të mëdha të kësaj qeverie.
EDI RAMA
KRYEMINISTER I SHQIPERISE
“Doni apo s’do ju, “Ballkani i Hapur” do të vazhdojë, pasi është në interes të shqiptarëve dhe ne shqiptarëve na e kanë besuar këtë, PS-së, dhe jo juve.”
TRITAN SHEHU
DEPUTET, PD
“Për ju aktualisht ka vetëm një rrugëdalje, si zgjidhja më mirë edhe për vendin. Dorëheqja tuaj. Unë ju kërkoj sot dorëheqjen se keni dështuar me këtë projekt.”
Shefi i qeverisë replikoi me opozitën edhe për vendimin e Kosovës për të qëndruar jashtë projektit të “Ballkanit të Hapur”.
Tritan Shehu
“Vërtet mendoni se Serbia ka hequr dorë nga pretendimet ndaj Kosovës? Ju vetëm bëni presion mbi Kosovën pse nuk i bashkohet një tryeze të ngritur nga Vuçiç..”
EDI RAMA
“Unë di që Kosova humbet një shans edhe për problemin me Serbinë, duke munguar në atë tryezë, historia tregon se ndërtimi i marrëdhënieve ekonomike është përdorur në histori si një katalizator për të zgjidhur çështje politike.”
Pjesë e debatit mes dy politikanëve u bë edhe qëndrimi i partnerëve ndërkombëtarë ndaj këtij projekti.
TRITAN SHEHU
EDI RAMA
“Unë nuk hy në garë me kë është Amerika e me kë është Europa. Të kujtohet ai filmi ku i thoshte ai ‘burri ata do të na rrahin’. Ka rëndësi se çfarë mendojnë aleatët tanë por më rëndësi ka se çfarë bëjmë ne për vendin.”
Projekti “Ballkani i Hapur” është në qendër të debateve mes opozitës dhe qeverisë prej momentit të krijimit.
Sipas opozitës ky projekt largon Shqipërinë nga rruga e integrimit në BE dhe fuqizon Serbinë dhe synimin e saj për një Jugosllavi të re.
Por për kryeministrin Edi Rama, “Ballkani i Hapur” ka në themel 4 liritë bazë të Bashkimit Evropian, zbaton parimet e tregut të përbashkët rajonal dhe është një mekanizëm për të jetësuar procesin e Berlinit.
Për të ilustruar nevojën e këtij projekti, Edi Rama ka listuar disa shifra; psh për shkak të barrierave kamionët e eksport- importit shpenzojnë 28 milionë orë në kufijtë e rajonit tonë, duke theksuar se ky bashkëpunim mund t’i krijojë hapësirat që ekonomitë tona të rriten me 6.7%.
