Pas dështimit të bisedimeve të një dite më parë Hesbollah ka lëshuar një breshëri raketash ndaj Izraelit. Alarmet e emergjencës janë aktivizuar në veri të vendit.
Sipas raportimeve të mediave të huaja, të paktën tetë raketa janë interceptuar nga sistemet mbrojtëse ajrore izraelite, ndërsa disa të tjera kanë rënë në zona të hapura.
Deri në këto momente, nuk raportohet për viktima apo të lënduar.
Ndërkohë Donald Trump është shfaqur optimist për ditët në vijim, duke paralajmëruar ngjarje me ndikim të madh në situatën në Lindjen e Mesme.
“Besoj se do të shihni dy ditë të mrekullueshme që po vijnë. Me të vërtetë e besoj këtë”, tha Trump.
I pyetur nëse lufta mund të përfundojë përmes një marrëveshjeje apo përmes neutralizimit të kapaciteteve të kundërshtarit, presidenti amerikan theksoi se të dyja opsionet mbeten të hapura.
“Mund të përfundojë në çdo mënyrë, por mendoj se një marrëveshje është më e mirë, sepse më pas do të mund të rindërtojnë. Realisht kemi një regjim të ndryshëm tashmë. Në çdo rast, ne i kemi neutralizuar radikalët. Ata nuk janë më këtu”, tha Presidenti.
Ndërsa tensionet vijojnë të ndihen në Lindjen e Mesme nëpërmjet një postimi në Truth social Trump nuk i kurseu kritikat ndaj Papa Leone XIV dhe NATO-s.
Pasi raundi i parë i negociatave përfundoi pa ndonjë përparim, Donald Trump shpalli një bllokadë detare ndaj anijeve që përdorin portet iraniane në Gjirin Persik, në një përpjekje për të rritur presionin mbi ekonominë e vendit dhe si kundërpërgjigje ndaj mbylljes pothuajse totale të ngushticës së Hormuzit nga Irani për anijet që përdorin porte të tjera të Gjirit Persik.Bllokada ka krijuar pasiguri të mëtejshme për transportuesit dhe kompanitë e naftës.
