Agjentët e antidrogës zhvilluan sot një aksion për goditjen e një grupi të dyshuar të shpërndarjes së lëndëve narkotike, pranë shkollës së bashkuar.
Policët civilë, por të armatosur, bllokuan një makinë luksoze tip benz me xhama të zinj, për ta kontrolluar, por shoferi jo vetëm që nuk ju bind, por madje i iku grupit duke iu rrezikuar edhe jetën.
E gjithë kjo ngjarje u filmua me celular nga gazetari Ergys Gjençaj dhe një kolege e tij.
Vetëm pak sekonda pasi iu iku i dyshuari, agjentët e policisë iu vërsulën gazetarit duke e shtyrë e më pas duke e shtrirë në tokë me fytyrë përdhe.
E gjithë kjo ndodhi edhe pse vetë Gjencaj i bëri të ditur policisë se ishte gazetar dhe po bënte detyrën e tij. Por kjo nuk mjaftoi. Ai u mbjat si të ishte një kriminel për shumë minuta, derisa më në fund u la i lirë.
Lidhur më këtë incident prokuroria e Tiranës nisi hetimet për verifikimin e ligjshmërisë se veprimeve të efektiveve.
Ndërkohë pak orë pas ngjarjes, policia bëri të mundur arrestimin e personit që i iku agjentëve si dhe të dy personave të tjerë, të dyshuar si 2 shpërndarës droge përmes kutive të picave.
